SARATOK: RM25,000 udah diungkupka Komiti Pemansang enggau Pengelikun Genturung Pendiau (JKKK) Rumah Enjawan, Krangan Rusa Ulu.

Sapit Menteri Pengeluar Kuasa enggau Pengeraja Asal, Ali Biju madahka agih belanja nya diberi nengah Projek Mit Pemansang Menua Pesisir (MRP).

Ku iya, mayuh program enggau pengawa ulih diadu ungkup pemansang ekonomi rama sida Enjawan serumah baka udah dipinta sebedau tu.

“Ambika chunto, kita serumah ulih ngatur pengawa beripai ngupas kandang ngelingi rumah dikena nyendiaka diri ngintu Hari Krismas enggau ngerami Taun Baru 2021.

“Kelimpah ari nya, sebarang pengawa ti meri pemaik ngagai kita serumah baka ngatur kelas belajar ba ruai (RBL) ungkup pemansang pelajar bala anak mega tau diperunding.

“Kitai diatu bela diperansang ngemeranka idup enggau belajar chara baru sekumbang Atur Mindah Betagang Penyuman (PKPP) dipejalaika perintah,” ku iya.

Jaku Ali nya dikenataika pengari iya, pengajar Walter Changgai lebuh nyuaka chek MRP nya ngagai Tuai Rumah Enjawan Ajie ba Krangan Rusa Ulu ditu, ensanus.