KUCHING: Pelasar bedagang nengah media rama baka Facebook, Instagram enggau Youtube udah mujur ngelakuka dagang kraf jari Eraminiza Eddy nyentuk dikelala lalu matak siku pemeli ari menua Switzerland.

Eraminiza, 26 taun madahka siku indu benama Jessie Jessica Duyun ari menua Switzerland udah ngudar tikai ukir kain tenun dalam taun 2019.

Iya berengkah beranyam ari taun 2017 laban ati sigi rindu beranyam tang enda nyangka pengerindu nya nyadika dagang iya nyentuk sehari tu.

Ku Eraminiza, iya endang lama udah deka beranyam tang agi berati enggau belajar ari orang bukai.

“Aku endang rindu beranyam, nya kebuah aku nguji belajar beranyam buah tikai ke mudah dulu ari sida landik nganyam tikai.

LAKU… Tikai buah kain tenun entara tikai pemadu laku dijual Eraminiza.

“Pemuas ke belajar, aku berengkah nganyam tikai kediri empu tang bisi sekeda bala madahka diri rindu meda pemanah tikai dianyam aku lalu sida deka meli tikai nya.

“Berengkah ari nya, aku nguji nyual tikai dianyam aku tang aku enda nyangka dagang tu nerima mayuh peminta,” ku Eraminiza lebuh dirandau Suara Sarawak.

Peranak ari Rumah Patrick Libau, Sungai Tangap, Niah tu madahka diri ngaga tikai anyam bebuah ngena tali kutak nunda chara orang bukai.

Naka tu, Eraminiza madahka iya suah nerima udar ari serata Sarawak.

Iya mega bisi nerima udar ari menua Sabah enggau Semenanjung sereta ari menua luar baka ari Switzerland.

“Entara buah tikai ti dianyam aku tu baka buah tungku, buah kara jangkit, buah mata puna, bungai sintung bini Sengalang Burung enggau buah enseluai nyeberai.

“Bisi mega buah angkung, buah tekura, buah empelawa, buah bankit batiang, buah dan lun besilang enggau buah terabai.

Kelimpah ari ngaga tikai anyam bebuah, iya mega bisi ngaga tikai sidan. Nambahka nya ku iya, rega tikai ti dijual iya tu nitihka pemesai iya.

“Rega tikai bebuah enggau tikai sida tu nitihka pemesai enggau bila tali.

“Ambika banding, tikai nya deka mar agi rega enti lambar tali nya alus agi laban begunaka awak lama nganyam bansa tikai nya,” ku iya nerang.

“Dalam sebulan, aku untung manggai RM3,000 kelimpah tikai sidan nya berega urung RM20 ngagai RM80 siti.

Berebak enggau nya, Eraminiza madahka rega siti tikai anyam bebuah nitihka pemesai, ukir enggau mudah tauka enda tikai nya dianyam.

Ku iya, tikai anyam bebuah sedang iya pemesai berega RM350 lalu tikai ukir tenun entara tikai pemadu mayuh diudar bala penguna naka diatu.

Nya alai, barang sapa ti deka nemu silik agi pasal tikai sidan enggau tikai anyam bebuah tau ngelawa Facebook, Youtube enggau Instagram Reycha Craft.

ALUS… Rega tikai sidan tu nitihka pengalus tikai dianyam enggau pemesai iya.