ASAJAYA: Pengeregas nembiak deka nentuka menua mega nyadi regas sereta ngujungka menua terus mansang maju ke mua.

Kepala Menteri Datuk Patinggi Abang Johari Tun Openg madahka Perintah Sarawak ngatur mayuh pekara dalam mantu nembiak majak regas di menua tu.

“Pelasar baru perintah nyata dipeda lebuh mantu raban nembiak ba pekara sastera enggau seni numbuhka Palan Latih Seni enggau Main Asal di Dun Lama.

“Ambika chunto penanyi Hafiz ti tebilang ba seni belagu sereta nembiak bansa Kelabit ti bulih champion di Argentina,” ku iya.

Abang Johari bejaku munyi nya ba Pengerami Ngintu Hari Nembiak Renggat Negeri Sarawak 2020 di Kompleks Lumba Asajaya, Samarahan ditu, kemari.