KUCHING: Pintar enggau landik ngerebut peluang ba dagang pemakai ngujungka Minchong Jaban, 53 taun, ulih beretan lama ba dagang tu.

Ku Minchong madah, lepas sekula suba iya lalu ngentapka pendiau diri ba Kuching. Kereja bekuli baka orang bukai.

“Udah nya aku bulih kereja ba sebuah hotel tebilang ditu lalu gawa dia pengelama 25 taun sebedau ngemaduka diri.

“Udah badu kereja dia, aku belelang ke menua Johor kin laban bulih kereja enggau orang bansa Peranchis.

“Pulai bekuli ari Johor nya baru aku teulihka runding enggau muka dagang pemakai tu,” ku iya lebuh ngepunka randau begulai enggau Suara Sarawak.

LANDIK NYUMAI… Bini Minchong benung kiruh bebelaka lauk ba dapur stall Dayak FastFood.

PEMAKAI ORANG SAMPUN

Peranak asal Kampung Sampun Gerunggang madahka dagang pemakai dipejalaika seduai melaki bini nya diberi nama Dayak FastFood udah ditumbuh kena 9 Mei 2013 suba.

Ku iya, pemakai rumah panjai endang bisi pengelebih enggau pengulih besai ba makit dagang pemakai lebih agi sida ti datai ari rumah panjai endang napatka pemakai tu.

“Dagang kami duai tu ditibak ari penemu aku empu, pemuas ke berunding nama bagi pengawa ke bisi pengulih enggau diterima mensia mayuh.

“Lebuh aku beratika nadai siku bansa kitai Iban udah tauka bisi bejual begulai enggau bansa China ba Open Air, di tengah-tengah indu mengeri ditu, nya alai aku nguji,” ku iya nambah.

MANAHKA PENGERAI… Manuk sumai kachang ma

DITERIMA MENSIA MAYUH

MINCHONG madah, terubah ngepunka dagang suba, bisi tujuh ngagai lapan bansa lauk aja disumai tauka dijual seduai dalam sehari-sehari.

“Maya nya, aku apin nemu tauka apin ulih melaba baka ni timbal mensia mayuh ngagai pemakai rumah panjai kitai tu.

“Taja pia, tau dikumbai jarang belaluh pemakai ke dijual, suah mega sida ke datai deka makai ditu pulai mai ati asa laban enda ampit lauk dikedeka ati.

“Sinu lebuh meda mua tudah ke lebu ngandalka diri ulih makai utai disera nyawa sida. Bisi sekeda minta bansa pemakai baru dijual kena nambahka pemakai ke bisi.

“Puji Tuhan, diatu bisi 13 ngagai 14 bansa lauk nitihka peminta bala mayuh ke endang nyadi temuai ke seruran datai makai kitu,” ku iya nikalka kenang diri.

PEDAS TANG NYAMAI… Tubu resih sambal pedas

DAGANG LAKU

Minchong madahka diri chukup puas ati meda pemanah timbal diterima seduai melaki bini laban kenu ku ati iya suba semina deka nguji ngapa.

Ari nya iya bangat nadai ngadang dagang pemakai ngelakuka nya lalu peminta majak nambah sekumbang ke bedagang tujuh taun ke udah.

“Tebal agi sida ke datai makai ditu nadai ngira sekalika maya pagi hari, ngetu merarau tengahari tauka makai lemai endang sida ke bekereja semak ditu.

“Enti tengahari, sida ke gawa ba opis perintah endang semampai napatka endur tu, bisi nya duduk makai ditu lalu sekeda nya bungkus bai pulai lebih agi sekumbang pandemik Covid-19 tu.

“Suah mega aku nerima pesan nyadi Katering ari luar baka ungkup ngerami hari pengada enggau pengerami melah piang tauka beterang, makai serumpu diri sebilik kelimpah bisi nyendiaka pemakai maya penusah rabat.

“Rega genap servis tu mega bebida laban bepanggai ba bansa enggau pemayuh lauk diudar, penyampau temuai ke ditaga datai ngulu pengawa sehari nya,” terang Minchong sambil tuchum.

LAUK KITAI… Perut manis gulai buah berunai

LAUK RUMAH PANJAI

Ngenang pasal bansa pemakai tauka lauk semampai ditapatka bala temuai ku iya, ikan keli sumai asam pedas, ikan keli guring, perut jani nanas enggau daun empasa tutuk.

Lauk rumah panjai bukai ke tau dikena mantupka pengelenggau diri ngagai menua baka paku keru rebus, dagin jani kichap, manuk sumai kachang ma, manuk tuai gulai daum empasa gusuk, tubu manis sumai pedas enggau mayuh ke bukai.

Kelimpah ari nya, pemakai dikumbai lok-lok mega bisi dijual ditu ngambi bala temuai ke datai bisi pilih bukai.

“Munyika bula nusi ke nuan, empai mansau lauk disumai, udah bisi bala telefon nanya sekalika bisi nyumai ikan keli sumai asam pedas tauka nadai.

“Sida madahka isi ikan keli tu nadai bau ambuh taja nya ikan keli tupi dalam pegung.

“Tambah mega bekal rempah dikena baka asam kepin, kunyit idup, selali enggau ke bukai dikena indai tuai aku nyumai endang dipilih enggau dibeli ari orang ke bedaja ba tamu.

“Enti bansa daun babas mega dibeli ari sidak ke datai bedaja ari menua maya tumu pagi seraya ikan keli, manuk, dagin jani enggau ke bukai bisi pemekal kediri empu,” terang iya nyentuk.

PEMAKAI BEPENGERAI… Paku keru rebus

NGENTAPKA DAGANG

Lebuh ngenang pasal juluk ati diri, Minchong endang bisi ati deka ngerembaika dagang besai agi tang semua nya apin ulih dikereja ketegal suntuk orang mutarka pengawa.

“Nyumai tu ukai pengawa ke muntang baka mulut ke nyebut laban asai lauk ke disumai siku-siku enda sebaka.

“Ari nya aku bisi penangi. Nya alai aku enda berani muka dagang baru ba endur bukai taja kala nerima peminta laban nadai pekereja.

“Tambah mega dagang kami duai diatu udah entap kelimpah bisi temuai kediri empu,” ku Minchong.

Ke penerang, stall Dayak FastFood tu semak mua penatai ari paking bas ba Open Air lalu dibuka ari Hari Minggu nyentuk Hari Empat lalu diau dua hari kena Hari Lima enggau Hari Enam.

“Taja pia, enti bisi pengawa bukai deka diatur, ke enda tau enda diadu, dia kami duai deka diau, tang enda suah.

“Stall buka ari pukul 8.30 pagi, belabuh mela enggau nyumai lauk ba dapur dalam stall tu empu lalu dinah ba endur ke udah disedia ba mua stall.

“Enti lauk abis tumu, tumu mega nutup dagang, kira pukul 1.30 ngagai 2 lemai. Nya mih sekeda bala temuai enda ampit lauk laban tumu abis,” ku iya nyimpul randau.

Sebarang tanya silik pasal pemakai enggau servis catering Dayak FastFood enggau Lok-Lok tau telefon ngagai Minchong empu ba lumur +60 11-2504 5156 tauka +60 17-856 281.

Aram sama nyukung dagang pemakai asal kitai laban tu sebagi ari identiti bansa kitai di menua tu.

SEMAMPAI DITAPAT… Ikan keli sumai asam pedas