SIBU: Peranak Bawang Assan dilalau terus nyukung Perintah Sarawak ke diatu, ungkup pengidup ti manah agi dudi hari ila, ku Senator Robert Lau.

Ku Lau, tanggung pengawa ketuai tauka pengari rayat iya nya meri servis ke rayat, lalu penyerakup enggau pengelikun nembiak redak sida endang pekara ti patut dikemerat.

“Aku ngelalau peranak Bawang Assan terus nyukung perintah Gabungan Parti Sarawak (GPS).

“Tang sayau, Adun Bawang Assan udah ninggalka perintah sereta nyadi siku Adun penyakal lebuh maya nya.

“Diatu mayuh bendar pemansang agi diguna peranak ba kandang Dun tu,” ku iya nyemetak madah.

Iya madah munyi nya lebuh belicha ba Program Begulai Enggau Rayat ba Rumah Dennis Assan di Bawang Assan, apin lama ke udah.
Berindik ari nya, Lau mega nyuaka bantu MRP ngagai rumah panjai ba Bawang Assan, Bukit Besai enggau Bekakap.

Ku iya, semua rumah panjai ke bukai ba kandang Dun Bawang Assan mega deka nerima bantu MRP.

Berebak enggau tu, ku Lau, semua peranak ba ditu patut nyukung perintah ke diatu enti sida dekaka pemansang ba kandang bagi menua tu.

Sama bisi ba program tu empai lama iya nya Sekretari Politik Kepala Menteri Romeo Christopher enggau Daniel Bujal, raban kunsilor ari Opis Pelilih Menua Pesisir (SRDC) sereta sekeda bala ke bukai.