KUCHING: Komiti Penyangga Penusah Ngenyit Negeri (JPBN) nendurka atur enggau bala pengaji ti ditemu mai orang luar tama ke Sarawak nadai pemendar.

Pemangku Chairman JPBN Tan Sri Datuk Amar Dr James Jemut Masing madahka tu kelebih agi ngagai orang tama nadai pemendar ti bisi risiko tinggi ngerekaika penyakit Covid-19.

“JPBN nengah aum benung ngatur atur ke engkeman ungkup orang ti ngempu dagang ti ngaji rayat menua luar nadai pemendar (Pati).

“Kebuah pia, laban sekeda kes positif Covid-19 ba Serian enggau Kuching bisi bekaul enggau rayat menua luar ti deka gawa lalu tama nadai pemendar,” ku iya dalam siti penerang media ditu tadi.

Naka tu empat kes ditemu endang datai ari pekereja menua luar ti tama nadai pemendar kitu.

Iya madah ejensi perintah bekaul udah diasuh ngambi atur terit ngagai sida.

Iya nandu, perintah nengah JPBN sigi bebendar deka mutarka pengerekai Covid-19 di menua tu lalu deka netapka atur ti terit ngagai pengaji ti ngambi rayat menua luar gawa nadai pemendar.

“Atur tu ukai semina ungkup pengempu sektor dagang tang mega ngagai semua sektor ke bukai,” ku iya.