KUALA LUMPUR: Opis Wang Turu Pengereja Pengawa (KWSP) deka berundingka perambu ngemanah agi atur mansutka duit nengah i-Sinar.

KWSP ba sebengkah penerang madahka, genap polisi enggau atur ke dikemanah nengah i-Sinar deka dibantaika raban komiti iya ngambi dikemendar sebedau dikenatai ngagai Opis Menteri Wang.

“KWSP beratika mayuh ripot media pasal peminta madamka semua atur enggau syarat ditetapka dalam i-Sinar.

“Kami seruran ngemeratka peminta enggau perambu ari raban bekaul.

“KWSP nerima manah sebarang timbal pasal i-Sinar, tang tatak tu nadai ubah pasal atur i-Sinar,” ku penerang nya.

Nitihka penerang, mayuh orang ulih minta ari lapan juta kaban KWSP nengah Kategori 1 enggau diberi pemendar terus kelimpah nadai begunaka sebarang dokumen.

“Kita tau nganjung peminta nengah online berengkah ari 21 Disember tu enggau deka dibayar tengan bulan Januari 2021,” ku penerang nya.

Sebedau tu, media ngeripotka syarat dalam Kategori 1 ngaul raban ti gawa ba sektor formal, gawa kediri, gawa dalam sektor ekonomi baka sida tu lama nadai kena putung KWSP, putus pengawa, bini kereja di rumah tauka sida ke diberi kemisi nadai begaji.

Syarat ba Kategori 1 tu iya nya kaban ti nadai kena putung KWSP abis nadai dua bulan lebuh nganjung peminta tauka kaban ti agi gawa tang batang gaji diputung 30 peratus enggau besai ari nya pengudah 1 March tu tadi.

Ba Kategori 2, ungkup kaban ti agi gawa tang gaji diputung 30 peratus tauka lebih ari nya (nyengkaum gaji enggau elaun tauka elaun gawa lebih ari taga) pengudah 1 March enggau pekara tu ditemu nengah dokumen ti diberi.