KUCHING: Program Pelajar Komuniti Penan (PCEP) mujur nempa ikon kelimpah meransang anak Penan makin maju.
Pekara tu ulih dipeda lebuh penyampau nembiak Penan ke nadai nurun ke sekula udah kurang lalu peratus sida nampung pelajar ngagai tikas ke tinggi agi majak nambah.

Pengatur PCEP, Dr Abang Ismail Abang Julhi madahka PCEP dipejalai pengelama sepuluh taun, berengkah ari taun 2010 nggai 2020 ngambi matih 100 iku anak Penan nyadi pengajar.

“Bala nembiak dekaka pengajar nya nyadi chunto sida lebuh pengajar Penan dianjung gawa ba sekula ba kandang menua sida empu.

“Kenyau ari program tu dipejalai, peratus nembiak besekula majak nambah laban suba nembiak Penan ti enda nurun ke sekula nunjukka peratus ti tinggi.

“Pia mega, penyampau sida ti besekula ba sekula sekondari mega nambah dibanding suba,” ku Dr Ismail madah ngagai Suara Sarawak.

Ku Abang Ismail, nengah PCEP tu, sida deka ngiga anak Penan ti udah apus sekula Pom Lima ngambi diasuh nampung pelajar ngagai Palan Pematih Pengajar (IPG).

“Kami deka intebiu enggau nerang ngagai sida pasal Degree Pemulihan ti disediaka.

“Sida deka belajar pengelama lima taun ke alai taun keterubah ungkup program penyikap tumu enggau empat taun nya ungkup program degree.

“Bekaul syarat nampung pelajar kia, bala nembiak mesti ngembuan enam kredit ba sebarang subjek, minat nyadi pengajar, suah ngulu aktiviti kokurikulum enggau peranak Malaysia,” terang iy.

Ku iya, Pelilih Baram bisi 22 palan pengentap bansa Penan, Pelilih Belaga (enam), Bintulu (dua) enggau Limbang (siti).

Abang Ismail ti mega Pengelicha Kanan IPG Batu Lintang madhaka PCEP tu ngaul apai indai nembiak Penan nengah Program Pengelandik Apai Indai.

“Lebuh kami bejalaika program tu, kami deka bekerejasama enggau raban bepenau ari mayuh ejensi baka Opis Pengerai, Opis Pengerejister Bansa, UiTM enggau Komiti Pengawa Bepilih.

“Bisi sekeda komuniti Penan mesti beperesa pengerai, nadai tingki enggau ke bukai.

“Program tu mungkur semua pekara laban kami dekaka komuniti Penan nyingkang baka komuniti bukai ba Sarawak,” ku Abang Ismail nerang.