LIMBANG: Agih belanja Program Transfomasyen Menua Pesisir (RTP) enggau Projek Mit Pemansang Menua Pesisir (MRP) mantu ngerumban pemansang ba menua pesisir.

Adun Batu Danau, Paulus Palu Gumbang madahka agih belanja nya meri pangka besai ba pemansang menua kelebih agi di menua pesisir.

“Agih belanja pemansang nya ngayanka pengeran Perintah Sarawak dekaka genap kandang menua kena bungkur pemansang.

“Ambika banding baka ba Limbang, entara projek ti deka dipejalai iya nya Anjung Usahawan ba Pasar Medamit enggau Tedungan Limbang enggau nyeleti jalai Kampung Bawang Obor, Medamit, Ukong, Pulau Brunei enggau Ulu Lubai,” ku iya.

Paulus mansutka jaku nya ba Pengawa nyuaka geran MRIP diatur Palan Servis Adun Batu Danau di Dewan Bunga Raya, apin lama ke udah.

Ku Paulus, ninting taun Perintah Sarawak deka ngagihka belanja ngagai genap pengari rayat Gempung Parti Sarawak (GPS).

“Ba timpuh sepenggal ninting taun, Perintah Sarawak udah ngagihka belanja RM5 juta nengah RTP enggau RM2 juta nengah MRP ke alai semua nya RM7 juta ungkup setaun.

“Penyampau nya enda nyengkaum projek ‘walkabout’ Sapit Kepala Menteri Sarawak,Datuk Amar Awang Tengah Ali Hasan beungkus RM1.5 bilion nengah Ejensi Pemansang Wilayah Utara (NRDA),” terang iya.

Ba pengawa nya, bisi 54 Gerempung Ukai Dikuasa Perintah (NGO) ari Dun Batu Datau nerima geran RTP penyampau RM517,000.
Sama datai Temenggong Willie Marum Liaw, Pemancha Robert Kunyu Anggau enggau Penghulu Ekit Awang.