KUALA LUMPUR: Perintah deka ngemanah sistem e-Kasih ngena teknologi baru ngambi ngulihka penerang ke betul ungkup rayat dalam kategori seranta enggau umang, pia ku Tan Sri Muhyiddin Yassin.

Menteri Besai madahka, RM6.8 juta deka diagih dikena ngemaru sistem e-Kasih ba taun baru.

“Aku sedarka sistem nya lama enggau enda engkeman agi, nya kebuah sistem nya deka dikemanah ngena teknologi baru ngambika penerang nya betul.

“Inisiarif nya nentuka chara baru deka dikena ngena nama e-Kasih mega tang ukai baka sistem e-Kasih ke lama.

“Aku pechayaka semua penerang ulih digumpul ba selampur menua sekalika ba mengeri enggau menua pesisir pengudah sistem tu dikemaru,” ku iya.

Muhyiddin mansutka jaku nya lebuh nyaut tanya tambah Datuk  Seri Ahmad Faizal Azumu (Bersatu-Tambun) ba Aum Parlimen, ditu kemari.

Ahmad Faizal deka nemu sekalika perintah deka bejalaika siti sistem ke engkeman agi kelimpah ari sistem e-Kasih dikena ngagihka bantu ungkup raban diselinting.

Lebuh nyaut tanya nya, Muhyiddin madahka perintah benung ngempung penerang ngambi ngelala raban baru dalam kategori miskin enggau umang ketegal pandemik sereta Atur Mindah Betagang (PKP) ba menua tu.

Ku iya, bisi 101,385 iku udah nagih insurans putus pengawa naka 3 Disember tu enggau 52 peratus ari sida nya begaji RM2,000 sebulan enggau baruh ari nya.

“Nitihka pansik pasal penyeranta mengeri enggau pengelantang rayat ba 500 buah ruang bilik di 16 sitak Program Rumah Rayat (PPR) ba Wilayah Persekutuan Kuala Lumpur ti dipejalai Unicef ba bulan Oktober tu tadi.

“Tikas orang besai tuai ke nadai kereja nya tinggi agi iya nya 35 peratus.

“Tikas penyeranta tinggi agi ari taun nyin tadi iya nya siku ari dua ruang bilik dikategori seranta,” terang iya.

Ku Muhyiddin, nitihka rikod Bank Dunya, pandemik Covid-19 ngujungka raban umang nambah entara 88 juta ngagai 115 juta iku ba serata dunya.

Berebak enggau nya, Muhyiddin ti mega Kaban Parlimen Pagoh madahka, Perintah benung enggau udah bejalaika inisiatif mulaika pemanah ekonomi enggau pekara rama ngambi nyebela ekonomi, pengerai enggau pengelantang rayat kelebih sida dalam kategori miskin.

Terang iya, bemacham program enggau inisiatif dipejalai ngambi mantu raban nya nyengkaum nyendiaka bantu ninting bulan, Bantuan Prihatin Nasional (BPN) enggau program bantuan sara hidup.

“Perintah seruruan fokus ba agenda munaska penyeranta dalam Pelin Pemansang Menua naka tu.

“Nya alai, kitai udah numbuhka Komiti Khas Kabinet kena 2 September tu tadi ngambi nagang penyeranta.

Komiti tu mega berandau pasal polisi enggau strategi sereta inisiatif munaska penyeranta nyengkaum pangku pengawa opis menteri enggau ejensi bekaul nentuka raban diselinting nerima bantu enggau pengelikun dijaga, ku Muhyiddin.-Bernama