KUCHING: Pemujur Dr Ida Fatimawati Adi Badiozaman bulih Anugerah WEP Serakup Bansa Besatu (PBB) Orang Indu Malaysia patut nyadi chunto ngagai rebak baru, pia ku Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit (KWKPK) Datuk Seri Fatimah Abdullah.

Pia mega, Fatimah berasai gaga meda pemujur dijapai anak indu iya.

“Pengeransing enggau disiplin dikembuan Ida nya patut diteladan rebak baru.

“Kitai mesti belajar bebendar, ngembuan disiplin sereta ngembuan tuju ba pengidup enti deka mujur dalam pekara pelajar.

Fatimah mansutka jaku nya lebuh dirandau pemberita pengudah Program Ngabas Ruang Bilik Opis Orang Indu enggau Ruang Bilik Sarawak (JWKS) ba Kampung Selipar Putus, ditu tadi.

Datuk Seri Fatimah Abdullah

Ku iya, pemujur dijapai Ida nya ngembuan mayuh pemar kelebih agi kurang awak berandau enggau diri sebilik.

“Pemujur tu mujur dijalai enti sema diri sebilik enda nyukung enggau meretika pekara tu.

“Kami duai apai iya berasai gaga laban diatu iya suah ngaul diri dalam aktiviti ngaul komuniti, betemu enggau raban indu kelebih agi sida ke datai ari ruang bilik seranta, raban indai tunggal ti ngaul diri dalam pengawa dagang.

“Pia mega, Ida diatu majak meretika penusah enggau pemar diasaika raban indu tu,” terang iya.

Fatimah ngarapka pengawa Ida setipak pangku pengawa indu enggau lelaki deka tejapai ngambi ulih mantu indu Sarawak ngubah pengidup sida.

Profesor Madya ari Universiti Teknologi Swinburne Kampus Sarawak nya nerima Anugerah WEP PBB Orang Indu Malaysia ba Kategori Ngaul Industri enggau Komuniti.

Anugerah nya ngaku penau enggau ngenegapka raban indu tauka dikumbai Wanita UN tu inisiatif tu ngenang pengemeran dagang.

Menua bukai ti ngulu pekit tu baka menua China, India, Indonesia, Malaysia, Philiphines, Thailand enggau Vietnam dalam bulan November tu tadi ngambi ngerebut gelar pemenang wilayah Asia Pasifik ungkup Anugerah WEP Wilayah Asia Pasifik.