SIBU: Kaunsil Pelilih Menua Pesisir Sibu (MDLBS) deka bekerejasama enggau raban polis neritka undang-undang nagang pedagang di Sibu Jaya ti bejual ba kaki lima.

Chairman iya, Kaunsilor Sempurai Petrus Ngelai madahka pengawa bejual ba kaki lima nya ngelanggar Seksyen 26 Undang-Undang Kecil Ordinan Pihak Berkuasa Tempatan 1999 (Kebersihan).

Ku iya, sida ulih kena tinggang ukum RM1,500 ba penyalah keterubah lalu enti agi ngereja penyalah baru, sida tau kena tinggang ukum RM3,000 tauka dijil semilan bulan tauka kededua ukum nya.

Sempurai madahka iya suah beratika pekara nya ba Sibu Jaya lalu bisi sekeda pedagang enggai nitihka atur ti udah ditetapka MDLBS.
“Lebuh beratika pekara ke nyadi ba Sibu, kami deka neritka atur undang-undang laban bisi sekeda pedagang ukai semina mandangka barang dijual aja tang kaki lima nya nyau nyadi kedai sida.

“Pekara baka tu endang dikemendar taja sida mayar permit mandangka barang tang enda dikemendar ngena kaki lima nyadi kedai sida.

“Atur tu udah diterang ngagai sida sebedau tu,” ku iya ba aum pemberita, ditu kemari.

Iya mega madahka sekeda pedagang ngena kaki lima ketegal nagang barang sida ari dichuri.

“MDLBS enda kala ngemendarka kaki lima nya ditutup tauka endur sida engkah barang.

“Aku udah madah ngagai ketuai penerit adat ngambi neritka undang-undang enggau polisi berengkah sehari tu,” ku iya.

Sempurai madahka pedagang ti engkah barang ba kaki lima nyadika kedai sida deka diberi notis.

Ku iya, MDLBS deka neritka atur ngagai pengempu kedai kupi ti bedagang nadai lisin.

Ba lansa sama, iya madahka pengempu kedai ukai semina bedagang nadai lisin tang engkah mija enggau bangku ba kaki lima lebuh sida meresa endur nya.

“Kami deka neritka atur bekaul pekara tu kelimpah bejalaika atur ke patut laban sida nadai lisin,” ku Sempurai nerang.

Iya mega nagang kedai kupi tauka palan bebelika barang engkah troli, bangku tauka mija ba palan paking entukar.

Nangkan nya, Sempurai madahka pengawa baka nya ngenusahka mensia mayuh ti deka paking dia.

“Mayuh orang deka datai ke Sibu Jaya kelebih agi maya ujung minggu,” ku iya.

Berebak enggau nya, Sempurai madahka MDLBS deka neritka syarat Atur Pengawa Standard (SOP) ba taun baru ngagai semua sitak dalam bidang kuasa iya.

“Taja pia, pekara tu apin dikenuku lalu semua pengawa sama magang, semina kitai neritka syarat dalam SOP Covid-19 ti kala dipejalai sebedau tu lalu bisi syarat ti deka diubah,” tandu iya.

Sama datai Sapit Chairman MDLBS Kaunsilor Wong Ching Yong sereta staf MDLBS ke bukai.