KUCHING: Siti kes baru positif Covid-19 ba Pelilih Kuching sehari tu lalu nya ngujungka penyampau semua positif diatu nambah ngagai 1,073 kes.

Sekretariat Komiti Penyangga Penusah Nengeri Sarawak (JPBNS) madahka kes ke-1,073 nya siku lelaki rayat nengeri tu ti baru pulai ari Selangor laban kemisi ngabas sida sebilik ditu.

Iya ditemu positif Covid-19 sehari tu pengudah beperesa rT-PCR lebuh sangkai ba Padang Bilun Entarabansa Kuching kena 9 Disember tu tadi.

Pia mega, iya udah dipasuk ba wad isolasyen Sepital Besai Sarawak (SGH) enggau pengawa nyidi kontak semak benung dipejalai seraya dikategori kes import B laban kena rampit ba endur ti bisi kes Covid-19.

Naka tu, bisi empat kluster agi ngerekai iya nya Kluster Besi, Kluster Jalan Abell, Kluster Greenhill enggau Kluster Wisma Saberkas.

Bisi 13 iku agi diperubat ba wad isolasyen ke alai 10 kes ba SGH enggau tiga kes ba Sepital Miri.

Nambahka nya, bisi 18 PUI baru dirikodka enggau siti PUI agi nganti pemutus peresa makmal.