KITAI Dayak Iban kelia endang tebilang ketegal berani, tebilang bedengah, mutus ati sereta enda kala ngeri betempuh enggau munsuh.

Bala aki kitai kelia sigi ditemu mensia mayuh kempang ngayau munsuh ngambi dibai pulai nyadika kelai sida berani.

Kebuah begunaka pala munsuh nya mayuh enda dikenang tauka dilansa aku ditu.

Mina siti aja disebut ditu iya nya sebedau lelaki kelia deka ngulihka ati indu tauka mai indu jadi, sida enda tau enda bulih dengah.

Pala munsuh nya meh nyadika derian orang lelaki lebuh deka bebini tauka nanya indu ti nyadi buah ati sida.

TAKAR PEMERANI

BASA KEPENUDI… Menua kitai berasai puang pengudah lenyau siku bujang berani, niang Awang Raweng ke beberita berani ngelaban munsuh lebuh menua agi siga kelia.

Diatu, pemerani ukai dikelai enggau pemayuh antu pala tauka pemayuh tampun atas bedilang baka kelia.

Tang takar pemerani nya ngena bintang berani tauka midul berani ti diberi perintah.

Midul tu dikena ngelai tauka kena nipak sereta nakar pemerani bala ti udah berambunka nyawa ngetan menua Malaysia enggau Sarawak Tanah Kenyalang ari kena pegai munsuh.

Mayuh bala soldadu tauka polis bansa Iban beteladanka pemerani niang Libau ‘Rentap’ tauka dalam main asal kitai iya disebut ‘Libau Panggau Dara, Rentap Tanah Kudi Menua’.

Tang, bisi mega orang nyebut ‘Rentap Apai Tambung ti lepung-lepung baka payung bulan nyintung tanggar peranama’.

Iya meh ti ngetanka menua lalu ngaga kuta ba Bukit Sadok lebuh menua agi siga kelia.

Ba kayau ketiga, Kuta Rentap ba Bukit Sadok alah laban bala Rajah Charles Brooke dalam taun 1867 lebuh sida kia lalu mai meriam Bujang Timpang Berang ti dikena ngebom kuta Rentap.

Pekara tu ngujungka bala sida Rentap rari ari nya tang enda kala nunduk ngagai Perintah Brooke.

PERANSANG ANAK IBAN

Pemerani enggau pengeran Rentap udah nyadi chuan, nyadi teladan.

Pia mega, berita pemerani iya nyadi peransang bala anak Iban rebak dudi ti ngujungka sida mega dikenang pemerani baka kitai ngenang Rentap.

Ari pemerani Rentap meh soldadu kitai ngena jaku peransang ‘Agi Idup Agi Ngelaban’.

Terubah Iban rebak baru pegari nama berani kelia nya Iban Tracker, niang Awang anak Raweng.

Niang Awang diberi perintah British midul berani George Cross (GC), iya nya midul berani lumur dua pemadu tinggi di Britain, kena 20 November 1951.

Iya meh anak Sarawak tunggal bulih midul kedua pemadu tinggi ba Britain nya.

Niang Awang ngayanka pemerani iya lebuh betempuh enggau munsuh lebuh iya sereta empat iku soldadu British kena tegah munsuh ba menua Kluang di Johor kena 27 Mei 1951.

Taja bakal kena timbak ba pah kiba, Awang agi ulih ngidupka siku soldadu British lalu mujur ngetanka diri betimbak enggau komunis pengelama 40 minit ti lalu ngujungka bala munsuh rari.

Nambahka nya, ,mayuh mega bala munsuh tumbang parai laban iya lebuh nya.

Nyadi udah bekau niang Awang anak Raweng GC, jarang kitai Iban enggau bansa bukai di Sarawak enggau Malaysia ti enda kala ninga drama Kanang anak Langkau.

Niang Temenggong PW I Datuk Kanang anak Langkau, SP, PGB, PBS (1945 – 2013) meh keterubah soldadu Malaysia nerima midul tauka bintang berani Seri Pahlawan Gagah Perkasa (SP) maya iya agi idup.

SP tu gelar lumur satu tinggi ba tusun gelar perintah Malaysia, tinggi ari gelar Tun.

Tu meh siti ari kebuah Kanang kala enggai nerima gelar Datuk diberi sekeda sida Sultan ari Semenanjung.

Taja pia iya nerima PGBK (Panglima Gemilang Bintang Kenyalang) ti mai gelar Datuk diberi Gabenor tauka Tuai Megai Menua Sarawak kena 24 September 2011 suba udah bekau ti nyadi Temenggong.

Semua soldadu bukai diberi SP nya maya sida udah parai. Kebuah pia, sida ngayan pemerani belaban enggau munsuh ti ngujungka sida empu pan parai mega.

Siku soldadu Iban ti bulih SP nya WP 2 Lenggau anak China ti ditemu bangkai iya nyendi bangkai dua iku munsuh ti udah parai belaban enggau iya kena 20 Januari 1971.

Lenggau diberi SP kena 21 Jun 1971 lalu siku bansa kitai Iban ti bulih SP nya niang Inspektor Reggie Deli.

Iya nerima SP maya agi idup lalu jarang ditemu orang laban ti enda tentu pengerai.

Nyadi Kanang mega anak Malaysia tunggal ti nerima dua bintang berani kelimpah ngangkatka nama bansa Iban.

Sebedau ti bulih SP iya endang udah bisi bulih midul Panglima Gagah Berani (PGB), bintang berani lumur dua tinggi.

Kanang bulih gelar SP maya iya bepangkat Serjin. Maya sida benung nyidi jelan bala munsuh, bala komunis dulu ari nya udah nimbak siku soldadu perintah ti ngujungka tudah nya lesi bebadi.

Sebedau tu, Kanang madahka diri endang bisi jai mimpi, tang enda ngasika nya laban keran deka nyidi penunga bala munsuh nya.

Nya alai lebuh sida betimbak, iya balat bakal ba perut tang agi ulih ditatka iya seraya meri jaku peransang ‘Agi Idup Agi Ngelaban’ ngagai bala bukai ti diuluka iya.

Taja balat bakal, Kanang agi ulih nyelamat siku dua bala soldadu lalu ngujungka seduai nya sama idup taja pen iya empu ‘parai’ lima minit tang idup baru.

Iya lama berubat sereta ulih pulai gerai lalu ditiki pangkat ngagai Warrant Officer I (WO I) sereta diberi Agong, Bintang SP.

Aku kala diayanka iya abi litan kena timbak ba perut nya dalam taun 1984 suba lebuh kami nemuai ngagai rumah iya di Kem Oya, Sibu.

TIMANG JALUNG

Tang sebedau aku meri tabi puji ngagai bujang berani kitai bansa Iban sereta bala bukai di menua tu.

Aku deka ngelansa mimit dulu pasal kelulu, kenang enggau tanya lemambang timang jalung lebuh sida nuntungka jalung ngagai bala sida ke berani belancham nyemilu tisi, nyaing muting geraji ti diambi ngirup jalung maya Gawai Antu.

“Lama kitai ke besaruk duduk bebanding.

Ku lama udah ninga gela nuan unggal dedarah sawa indu tedung, ba arung jalai pemuntang.
Oh sapa perinyai ambai sulu sangkung lebuh jawang agi gegayang gamal gegandung, alai tangan tunjuk ujung nuan tau diinjau orang nyuluk ka upung nyiur nyintung tak lepung-lepung mesai tempulung lang tansang, oh ku aku tansang lang.

” “Oh…lama lemai kitai ke besaruk duduk berintai, lama udah aku ninga gela nuan ke bedarah sama tedung tendai, entang ke tu lebuh kitai ke bejaku kelulu nyampau dirintai, kali jenti nuan udah bebini, tang lebih ka gayang gamal lelempai, sapa ambai tulang peransang…iya ku aku peransang tulang..oooh”

Kitai mega dulu ngading orang Panggau Libau ke Lendat Dibiau Takang Isang, Ngading orang Merawa Lama Munyi Ke Berimba Mungga Nebang, Ngading bala orang Meriu Batu Saum ulu enggau Sikup Bengkang. Ngading orang di kaki Tanah Ruji Menawa Laja Nyerenang Lumpang.
Ngading sida Tuchung Engkeranji Padi sereta Puting Titi Enda salah Baka Api Ke Nyadi Mauu Ngerendang.
Ngading sida Keling Gerasi Nading Bujang Berani Kempang, Jelingau Ke Betugau Mayuh Rambang, Keling Aji Rangka Bini Seribu Tunang, Datu Au Pemadu Nama Orang.

Raja Siku Penyangga Punggu Berangan Ninggang, Bujang Pengibun Tegar Hari Bilun Ensuruk Remang.

Ngading sida Laja Jelinga Tinggi Merabung Kajang, Patah Dabung Penyukung Rang, ngading sida Sempurai Munti Gerai Simbang Ka Jerungkang, Sepatu Manuk Antu Sabung Mali Lenggang, ngading sida Sepungga Aka Sebila Daun Sabang.

Anang meh kitai enda ngenang bala indu orang Panggau baka Endu Sempupu Aur Gangging Kerimpak Batu Cheling Bunsu Keling Gerasi Nading Mandi di Lembing Mata Pedang, sida Endu Sempupu Limau Bebunga Kerimpak Mata Sangga Bunsu Laja Jelinga Tinggi Merabung Kajang.

Kitai enda tau enda ngading sida Gelung Batu Nakung Nyingit Nyinggung Nyandar Nerabang, menua sida Indai Mendung Kupak Kundung Punggang Temawang.

Nya ga rumah panjai dipegai Ngelai Raja Besai Nadai Besinggang, Pauu Tunggul Enjun Beribu Nadai Beguyang.

Ngading bala lelaki bukai ke enda ulih sebut enggau mulut nyambut entupang, tetelah enggau dilah entara rang, bala raban mayuh sida ke ngara diri nunda leka pelaga gitang.

BASA NGAGAI BUJANG BERANI

Bala anak Iban ti udah nerima bintang PGB nya nyengkaum sida tu udah parai, sereta agi mayuh mega mengkang idup.

Tu nyengkaum ASP (B) Wilfred Gomez Malong (polis sereta penerima PGB pengabis biak), Lt Kol (B) Haji Robert Rizal Abdullah, Mejar (B) Michael Riman ak Bugat, PW II Indang Engkas, PW I Beliang Bali enggau Sarjan Dajai Anggi.

Sama mega enggau Koperal Lan Gima, Koperal Unggek Anting, Lans Koperal Bajau Ladi enggau Lans Koperal Sigi Endawan @ Nawan.

Sida tu raban soldadu magang seraya, pengabis dudi orang nerima bintang PGB nya Koperal Gani anak Binjol ti enggau masuk UNOSOM II di Mogadishu.

Iya parai kena 18 Julai 1994 lebuh balat belaban betimbak enggau munsuh ti alai iya chukup ngayanka pemerani.
Gani diberi bintang PGB kena 3 Jun 1995 taja pen iya empu udah lesi bebadi.

Ari sida tu, Lt Kol (B) Haji Robert Rizal Abdullah meh ti bepangkat pengabis tinggi nya, bulih PGB.

Iya bulih bintang nya lebuh agi nyadi Kapten kena 11 Oktober 1973 lebuh iya nguluka siti raban.

Lebuh nya mega, iya mujur munuh tujuh iku munsuh lalu ngulihka lapan iti senapang, taja pan maya betimbak nya bisi ga bala sida empu bakal enggau bebadi parai.

Beduduk ari nya, iya diberi bintang berani PGB kena 27 Disember 1973.

Diatu, Robert Rizal agi aktif nulis bup kena nambahka sekeda bup ti udah ditulis iya dalam jaku English enggau Melayu.

Iya meh ti ngepunka program ‘Mai Pulai’ bala bujang berani Iban 21 iku ti ditumbak di serata Semenanjung Malaysia suba ti ngujungka sida nya ditumbak ba Pendam Bujang Berani (Heroes Grave) di Kuching ditu dalam taun 2011 suba.

Bala soldadu enggau polis bukai ukai ketegal enda berani tang mayuh bendar bala sida tu nadai diberi PGB.
Sida semina diberi bintang enggau kelala bukai ke baruh agi.

Sekeda ari sida agi mengkang idup taja pen mayuh udah manggai umur lebih 60 taun.
Kami serumah, Setaf Sarjan (B) Jungan Buda siku ari orang ti agi regas lalu munyi ti udah nerima Pingat Jasa Malaysia (PJM) dudi tu tadi.
Siku petunggal aku ti enggau orang masuk soldadu nya Staf Sarjan (B) Spencer Birai ti mega kala nyadi chermin Gerempung Soldadu Veteran (PVTM) Sarawak.

Aya iya, WO 2 (B) Tom Dap mega siku ari kami sekaban enggau masuk First Sarawak Rangers suba.

Kitai ngarapka pemerani bala sida tu tau nyadika peransang nembiak rebak baru.

Ukai reti meransang sida nyadi soldadu tang ambi nyadi peransang dalam semua pengawa nyengkaum dalam pelajar sekula.

Lalu pia mega ba senentang ngulihka pemujur ba semua pekara, kitai enda tau enda bechuanka kangau peransang tulang soldadu ‘Agi Idup Agi Ngelaban’.

VALENTINE TAWI SALOK