KUCHING: Siti jalai penyambung baru deka disikap ngambi nyambung Kampung Beradek, Kampung Semilang enggau genturung pendiau besemak dia ngambi disambung ngagai Kampung Beliong.

Menteri Muda Infrastruktur enggau Pemansang Palan Penyangkai Kapal, Datuk Julaihi Narawi madahka perambu nyikap jalai nya deka dipejalai pengudah Feri Beliong beoperasyen ila.

“Jalai baru nya diperambu ngambi nyambung genturung pendiau nya enggau jalai besai ba Samarahan.

“Pengudah jalai alun disambung ngagai Beliong, genturung pendiau ti mar dilawa ngelawa tu bulih jalai penyambung ba Bagi Menua Samarahan,” ku Julaihi.

Julaihi mansutka jaku nya ngagai pemberita pengudah ngemata Pengawa Nyain Sempekat Pemereti Ati (MoA) entara Kaunsil Pengelikun Jalai Alun enggau Unimas Holding Sdn Bhd ba sebuah hotel tebilang, ditu ensanus.

Ngelansa pasal projek Feri Beliong, Julaihi madahka projek nya diatu agi ba renggat langkar tengkebang seraya projek nya deka berengkah dipejalai taun baru.

Terang iya, servis feri Beliong deka berengkah beoperasyen ba taun 2022.

Dulu ari nya, Julaihi enggau Menteri Dagang Temuai, Seni enggau Main Asal, Datuk Abdul Karim Rahman Hamzah udah ngatur pejalai nemuai seraya gawa ba taba feri Beliong dalam bulan Oktober tu tadi.