SERIAN: Kaban Kunsil Nengeri (Adun) Bukit Semuja John Ilus seruran meri perati bekaul infrastruktur diguna peranak ba Kampung Merakai ditu.

Beduduk ari nya, iya minta Opis Menteri Utiliti Sarawak berundingka peminta peranak ditu kelebih agi projek lampu jalai.

“Pengudah berapa taun ngasaika penampak disikap bekal kuasa karan, mua tauka simpang ngelawa genturung pendiau nya agi petang laban apin disikap lampu jalai,” ku John.

John mansutka jaku nya lebuh Pengawa Bejadika Projek Utiliti Merakai Bahagian Serian, ditu kemari.

Pia mega, iya minta opis menteri ngemuntangka pengawa nyambung bekal ai beresi nyengkaum bekal kuasa karan nengah grid ke diatu ngagai sekula ba genturung pendiau nya.

“Kebuah pia laban sekula nya agi ngena ai bukit enggau ai timbun nyengkaum agi ngena injin api,” ku iya nerang.

Nambahka nya, John minta Kaunsil Multimedia Sarawak (SMA) meri perati enggau ngemanah servis arus penyambung ba Kampung Merakai.

“Arus penyambung tu beguna amat kelebih agi maya pengerekai Covid-19 diatu,” terang iya.

Ba lansa sama, ejensi bukai mega dipinta beratika jalai alun ba genturung pendiau nya enggau besemak nyengkaum perengkaguna lumba sereta aktiviti betanam betupi.

“Aku andalka ejensi nya betatika pekara diguna peranak ditu,” ku John nyemetak madah.

Berebak enggau nya, iya madahka siti ari Program Transfomasyen Menua Pesisir (RTP) 2021 ba sitak Bukit Semuja iya nya nyeleti jalai kebun ba Kampung Merakai.

“Nya alai, kitai ngarapka pekara nya dikemendar lalu begunaka kerejasama rayat ditu ngetanka menalan kitai,” ku John.

Ke rikod, iya madahka Unit Pekara Pengarap Bukai (Unifor) udah ngagihka belanja RM100,000 ungkup projek nyeleti gerija ba Kampung Merakai.