KUCHING: Sarawak agi mansik pengulih Beting Serupai (James Shoal) di Bintulu dipelaba ngembuan rizab asil minyak 93 bilion tong.

Kepala Menteri Datuk Patinggi Abang Johari Tun Openg madahka naka tu, pekara nya agi dipansik laban pengulih tanjung nya digaga saintis menua luar ti dipansut dalam siti bup.

“James Shoal nya ngembuan asil minyak lalu bala saintis udah mansik pekara nya.

“Aku enda nemu sekalika Beting Serupai udah digali tauka bedau tauka engka kala digali kelimpah kitai nadai penerang silik bekaul pekara tu laban aku semina macha nya ari bup.

“Nya kebuah, kitai agi beratika perambu tu dulu,” terang Abang Johari.

Abang Johari mansutka jaku nya pengudah bejadika Pengawa Nasih Tanah Wisma Melayu Sarawak, ditu kemari.

Lebuh bejaku, Abang Johari madahka iya tetemuka pengulih Beting Serupai nya ari siti bup dibacha iya.

“James Shoal nya ba Bintulu lebuh aku meda kar dalam Google.

“Reti iya, kitai mesti pintar ngatur pemansut ba menua tu, ukai semina ba Bintulu tang mega datai ba Balingian, ari utara nyentuk Pulau Natuna semak Lundu,” terang Abang Johari.

Nya alai, iya madahka pengulih dikemisi dalam pemansut Sarawak nya begunaka saintis, penemu sereta pakar ari rayat Sarawak empu.

Beting Serupai nya tanjung ba Tasik China Selatan penalam 22 meter (72 kaki).

Ba kandang tasik Beting Serupai nya ngembuan telaga petroleum diempu Malaysia.

Beting nya penyauh 80 kilometer (50 batu) ari barat laut Bintulu enggau1,800 kilometer ari Tanah Besar China.

Ari sukut geografi, Beting Serupai tu ba pelantar benua Borneo.