KUCHING: Teknologi enggau inovasyen nya dua batang pekara ti meransang nyungkak ekonomi menua dudi hari, pia ku Kepala Menteri Datuk Patinggi Abang Johari Tuan Openg.

Lebuh beratika pekara tu, iya madahka Perintah Sarawak keran meransang anak Sarawak angkun belajarka Sains, Teknologi, Injinir enggau Matematik (STEM) ngambi nambahka kualiti raban pengereja.

“Nya kebuah, agenda pemansang Sarawak keran nentuka takah dalam sistem pelajar ulih diputar.

“Kami udah bejalaika inisiatif ngambi nembiak Sarawak nerima pelajar ti bekualiti enggau sebela tauka lebih bekualiti ari bakih sida ba Semenanjung Malaysia,” terang Abang Johari.

Abang Johari mansutka jaku nya lebuh bejadika Simposium Pelajar Jaku English Sarawak ti diatur nengah online kemari nipakka chara baru.

Dikena nyapai tuju nya, Abang Johari madahka Perintah Sarawak udah matih pengajar chakah iya ngiri penemu ngagai bala nembiak, ngaga baru tauka nyeleti sekula repuk enggau nambahka bungkur bekal ai beresi sereta bekal kuasa karan nentuka nembiak enggau pengajar belajar ba endur ti likun enggau lantang.

Nambahka nya, perintah mega nyendiaka bahan ungkup belajarka STEM.

Abang Johari madahka Perintah Sarawak mega numbuhka lima buah Sekula Sekondari Entarabansa Yayasan Sarawak.

Berebak enggau nya, iya madahka pemesai guna landik ngena tauka bejaku English ngagai anak Sarawak.

“Kitai deka bulih penguntung enti landik ngena mayuh jaku laban kitai deka nitihka pemansang teknologi kemaya hari.

“jaku English nya dikumbai jaku komunikasyen entarabansa enggau jaku kedua pemadu mayuh dikena ba dunya lebuh bup, journal enggau akademik kelebih ditulis enggau dipejurai ngena jaku English ngambi semua mensia ba serata dunya meretika pekara nya,” terang iya.

Terang iya, perintah Sarawak deka ngena jaku English nyadi batang jaku enggau jaku ti dikena dalam kort kelimpah ari jaku Melayu.

“Pengaji udah lama milih graduet ti ulih bejaku English laban nya jaku dunya dalam pengawa bedagang.

“Ari nya, aku nerima peminta ex-Menteri Pelajar Perintah Sarawak ngelempaika tanggung pengawa Sarawak nyadi nengeri keterubah ba Malaysia ti ngajar Sains enggau Matematik ngena jaku English,” ku Abang Johari.