KUCHING: Pengerami Bako Fest 2020 ke benung diatur nyentuk ujung bulan tu diperambu deka dipasuk ba Kalender Dagang Temuai Sarawak.

Kaban Kunsil Nengeri (Adun) Demak Laut Dr Hazland Abang Hipni madah, tuju langgur tu awakka program tu ulih meri pemaik ngagai peranak Bako empu lebih agi dalam nyungkak penatai pemisi.

“Taja serak tu pengerami nya deka diatur nitihka chara baru ketegal nagang pengerekai penyakit Covid-19, tang pengerichah Bako Fest 2020 dipelaba enda kurang baka sebedau tu.

“Bemacham aktiviti ke tau matak penatai mensia mayuh udah dirintai beserimbai enggau program tu.

“Entara aktiviti ke udah dirintai iya nya Lumba Penambang Enggau Bot Laju, Futsal, Sukan Rayat, Eksibisyen Auto, Pekit Nyumai Pemakai Asal, Kus Homestay enggau mayuh agi ke bukai,” ku iya.

Iya madah munyi nya maya bejadika Bako Fest 2020 ba Terminal Bako apin lama ke udah.

Berebak enggau nya, Dr Hazlan madah program tu disadang ulih nyungkak penatai pemisi peranak ditu beduduk ari penatai mensia mayuh ti ngemataka bemacham aktiviti ke bisi diatur.

Ku tandu iya, semua aktiviti deka diatur ninting ujung minggu sampai ujung bulan tu. -Ukas