KUCHING: Perintah Sarawak begunaka kerejasama ari semua komuniti dalam nagang pengawa salah nebang kayu belalai tauka nadai pemendar di menua tu.

Sapit Kepala Menteri ti mega Menteri Pemansang Mengeri enggau Pengeraja Asal Kedua Datuk Amar Awang Tengah Ali Hasan madahka atur terit nagang pegawa tu seruran diterit ninting maya.

“Kitai deka terus neritka adat enggau ngatur operasyen dalam nagang aktiviti nebang kayu nadai pemendar.

“Lebuh pengerekai Covid-19 pan pengawa nangkap orang nebang kayu nadai pemandar tetap dipejalai,” ku iya.

Awang Tengah bejaku munyi nya lebuh ditanya pemberita beserimbai enggau Pengawa Bejadika Opis Baru JHS di Begunan Baitulmakmur ll ditu, kemari.

Ki iya, atur tu mantaika perintah bebendar nagang pengawa salah nya.

“JHS mega bisi disediaka enggau sebuah bilun terebai ungkup matau pengawa nebang kayu nadai pemendar.

“Tang dalam nagang pengawa salah tu kami begunaka kerejasama ari rayat pupu bansa meri penerang nyema bisi tepedaka pengawa salah nya.

“Pia mega, aku minta JHS bejalaika kereja enggau penuh profesional gawa dalam siti tim nagang semua isu ti ayan kelebih agi nebang kayu nadai pemendar,” ku iya.

Iya nyemetak minta mensia mayuh ti meda pengawa nebang kayu nadai pemendar tu ngambika terus ngeripot ngagai JHS.

“Anang nangi meri penerang ngagai opis bekaul nyema bisi meda ulah ti nyelai dipejalai ba genturung pendiau sida.

“Pesan tu ukai ungkup orang di menua pesisir aja tang mega ngagai orang di mengeri, ba tebing pantai enggau semua palan bukai,” ku iya.