KUCHING: Kluster Jalai Abell di Pelilih Menua Kuching sehari tu dikenuku punas pengudah nadai ngerikodka sebarang kes baru dalam kandang 28 hari.

Komiti Penyangga Penusah Ngenyit Negeri (JPBN) madahka naka kediatu semina tiga iti kluster ngerekai agi bisi iya nya Kluster Besi, Kluster Green Hills enggau Kluster Wisma Seberkas.

Pia mega JPBN, madahka bisi siti kes positif Covid-19 baru dirikodka ba Pelilih Menua Kuching sehari tu ti ngujungka kes positif Covid-19 di menua tu nambah 1,075 kes.

Kes ke-1,075 tu siku indu rayat Sarawak ti baru pulai ari Kota Kinabalu, Sabah.

Indu tu siku nembiak ti benung belajar ba Universiti Malaysia Sabah pulai ke Sarawak kena 11 Disember nengah Palan Penerebai Bilun Kuching.

Kes beperesa RTK Antigen Covid-19 di Sabah kena 9 Disember tang maya nya pemutus peresa iya nadai ngayanka sebarang tanda lalu iya dikemendarka pulai ke Sarawak.

Lebuh datai ba Sarawak, iya sekali agi beperesa Covid-19 enggau dikuarantin sepengelama 14 hari.

Pemutus peresa rT-PCR iya kena 12 Disember madahka iya positif lalu kes udah dipasuk ngagai wad Sepital Besai Sarawak.
Kes tu ditukuka nyadi kes Import B iya nya berampit lebuh pulai ari palan ti bisi kes Covid-19 ba luar negeri.