KAPIT: Pekara pelajar nya kunchi nempa pemujur enggau pengidup ke menyana dudi hari, pia ku Adun Bukit Goram, Jefferson Jamit Unyat.

Kemari, Jamit udah nyuaka baucher ari Yayasan Sarawak ngagai sekula ba sitak Kapit.

Ku Jamit, baucher Yayasan Sarawak nya sebagi ari chara Perintah Sarawak mantu apai indai ti agi nyengula ke anak.

“Aku ngarapka baucher tu ulih meri peransang ngagai nembiak sekula ransing agi belajar enggau nyulut dalam pelajar.

“Pia mega, bala pengajar dikearap ulih bejalaika pangku pengawa mantu nembiak ti tusah.

“Kebuah pia laban pekara pelajar ulih ngubah pengidup nembiak,” ku Jamit nyemetak madah.

Bisi 802 penerima baucher ari Yayasan Sarawak ti disuaka Jamit ba Sekula Sekondari (SMK) Kapit 2.

Nambahka nya, iya ngelalau bala apai indai ngena manah baucher nya baka meli uniform sekula, kereban sekula enggau ke bukai.

Iya mega madahka piak sekula bempu tanggung pengawa ngelala nembiak ti begunaka bantu baka baucher tu nentuka semua nembiak dibantu nitihka pematut.

Berebak enggau nya, Jamit udah nyuaka agih belanja Projek Mit Pemansang Menua Pesisir (MRP) RM10,000 ngagai SMK Kapit ti nyadi palan nyuaka baucher nya, ditu kemari.

Sama datai Pemesai Pelajar Pelilih Kapit, Ringgit Saut, Pemesai Pelilih Kapit, Cerisologo Sabut, prinsipal enggau kepala pengajar ba Bagi Menua Kapit.