KUCHING: Pelin Ngintu Taman udah digaga awakka pengawa ngintu palan nya ulih dipejalai enggau manah agi sereta ulih digazet nyadi Taman Negara.

Sapit Kepala Menteri ti mega Menteri Pemansang Mengeri enggau Pengeraja Asal Kedua Datuk Amar Awang Tengah Ali Hasan madahka dalam pelin tu taman negara ti dijaga Opis Kampung Sarawak (JHS) dipindahka ngagai Ejensi Kampung Sarawak (SFC).

“Taman negara tu siti ari produk dagang temuai kitai lalu nyadi palan ti dikeandal ulih narit ati bala temuai.

“Diatu kitai ulih ngintu kampung enggau manah nyentukka Taman Negara Mulu diaku nyadi Palan Pesaka Dunya ba baruh Unesco,” ku iya.

Awang Tengah bejaku munyi nya lebuh ditanya pemberita beserimbai enggau Pengawa Bejadika Opis Baru JHS di Begunan Baitulmakmur ll ditu, kemari.

Ku iya, Perintah Sarawak ngembuan pelasar nguna tanah ti komprehensif lebuh ngalau tujuh juta hektar tanah ngagai sektor kampung.

“Tu nyengkaum sejuta hektar ungkup kampung dilindung penuh lalu enam juta hektar ungkup sektor ngurus kampung,” ku iya.

Berebak enggau nya, Direktor JHS Datuk Hamden Mohammad madahka Sarawak bisi ngembuan 41 buah Taman Negara ke alai 11 buah udah dipindah nengah pelin nya.

“Tiap bengkah taman tu bisi penyelai nyadi pengawa ngintu palan nya mega bebida.

“Taja pia, pejalai mindahka atur ngintu sebuah taman negara begunaka awak setaun ngagai dua taun.
“Opis kami ngarapka ulih mindahka tiga tauka empat buah taman negara dalam timpuh setaun,” ku iya.