TANJONG DATU: Urung RM4. 8 juta projek Bekal Ai Alternatif Sarawak (Sawas) udah ditinda ungkup Kampung Pugu, Kampung Sekambal, Selarat enggau Matang Terap Lundu dikemujur nengah Opis Bekal Ai Menua Pesisir Sarawak (JBALB).

Kaban Kunsil Nengeri (Adun) Tanjong Datu, Datuk Amar Jamilah Anu madah, projek nya dikena mutarka isu ai ke ditapi sekeda genturung pendiau enggau ngangkatka industri betanam betupi ba sitak Tanjong Datu.

“Diatu industri undang kara ai sungai sebengkah ari industri ke bisi peluang besai dikemansang lebih agi maya musin landas.

“Nya alai, nya tentu deka nyadi penatai pemisi tambah kelimpah ari nupi undang kara sungai nyema raban orang berikan nadai ulih nurun ke tasik,” ku iya.

Jamilah madah munyi nya maya Nutup Program Kus Kualiti Ai enggau Nupi Undang Kara Ai Sungai Agricop Pelilih Lundu diatur ba Dewan Serbaguna Mahligai Gading, Lundu, ensana.

Berebak enggau nya, iya madah asil nangkap undang galah mega ulih nyadi sebengkah agi alternatif endur raban orang berikan ngulihka penatai pemisi.

Sebedau nya, Jamilah bisi ngelepauka 3,000 iku anak undang galah enggau 3,000 iku anak ikan siakap ba tebing Batang Kayan.

Ku iya, pengawa nya awakka ikan ba endur nya enda pungkang, pia mega dikena matak penatai raban temuai raun ke pelilih Lundu. -Ukas