KUCHING: Pemujur dua iku nembiak Sekula Primari (SK) Temong, Serian iya nya Macgres enggau Nabiatul ngaga filem katun tauka animasyen ‘Batuh Bijanji’ chukup ngemegahka menua.

Menteri Dagang Temuai, Seni, Main Asal Sarawak Datuk Abdul Karim Rahman Hamzah madah diri chukup berasai gaga meda pemujur dua iku nembiak tu ke nyadi champion Filem Pemadu Manah ari akim ba kategori sekula primari di Festival de Cinema Escola de Alvorada’ (FECEA) tauka Festival Filem Sekula Entarabansa Alvorada di Brazil apin lama.

“Filem animasyen pandak seduai ti diberi nama ‘Batuh Bijanji’ tauka Batu Danji dalam jaku Bidayuh udah ngenyitka ati bala akim.

“FECEA siti festival entarabansa diatur ba menua Brazil kenyau 2014 endang ngaku asil keranjai jari seni audio visual ba renggat sekula primari,” ku iya dalam siti penerang media ditu, kemari.

Udah nya, Karim mega Menteri Lumba enggau Raban Nembiak meri pengaga ati ngagai dua iku pengajar Wan Zulfadli Ad-Dinnie Wan Azmi enggau Mohd Reduan Patah ti udah ngembing Macgres enggau Nabiatul sepengelama 10 hari ngasilka filem pandak nya.

Datuk Abdul Karim Rahman Hamzah.

“Filem pandak tu digaga nengah teknik ‘rotoscoping’ ti majak popular ba nembiak rebak baru ke rinduka animasyen baka filem Hollywood.

“Jalai cherita filem pandak tu chukup manah iya nya bekaul pasal dua iku nembiak ke benama Bibi enggau Sarah ti betemu nyadi bakih enda lama tang bisi sinu ba ujung cherita,” ku iya.

Karim mega madahka iya chukup gaga laban filem nya udah bulih lebih ari 1,000 orang ti meda taja baru tiga minggu dipasuk dalam ‘youtube’.

“Tu deka nyadi peransang mayuh agi ngagai nembiak rebak baru ngasilka filem tauka video ba maya ti deka datai.

“Ngagai sida ti rindu deka ngerembaika peneleba ba industri kreatif, sida ulih minta geran enggau bantu ari Dana Industri Kreatif Belia Sarawak (SYCIF) ba baruh Opis Menteri Nembiak enggau Lumba.

“Bantu belanja ti dipansutka Kepala Menteri tu endang enggau tuju deka meri sukung enggau bantu ngagai nembiak bepeneleba ngaul diri dalam industri kreatif,” ku iya.

Iya ngarapka Macgres enggau Nabiatul deka neruska juluk ati seduai ngerembaika peneleba ngaga filem.

“Taja agi biak, seduai udah ngasuh kitai temegah laban asil keranjai jari seduai udah dirintai ba Anugerah Animasyen Pemadu Manah (Sekula Primari),” ku iya.

Ku Karim, sebedau tu Macgres enggau Nabiatul kala diangkat ba 11 filem pandak Asia pemadu manah ba taun 2019 ba baruh inisiatif #SubmitYourFilm nengah laman web filem dalam tali arus Asian Movie Pulse.

Poster FECEA.