KUCHING: Pengawa numbuhka Raban Penyaga Kandang Tebing Tasik Sarawak (SCG) bukti nyata pengeransing Perintah Sarawak dalam nyaga pengelikun kandang tasik nengeri tu.

Sekretari Perintah Nengeri Datuk Amar Jaul Samion madah, SCG ditumbuh enggau juluk dikena nyaga sereta nagang aktiviti enda beradat ke nyadi ba kandang tasik Sarawak.

“Kebendar SCG tu ditumbuh ngambika ulih nyaga pengelikun ba kandang tasik nengeri tu.
“Nya alai, nya kelai nyata perintah nengeri endang bebendar nagang sebarang pengawa ke enda beradat rembus nengah kandang tasik kitai.
“Ambika banding pengawa berikan dikereja peranak menua luar kelimpah aktiviti enda dikemendar ke bukai,” ku iya.
Jaul madah munyi nya ba Pengawa Meri Basa Ngagai Unit Pengelikun Enggau Penerit Adat Nengeri (UKPN) ditu, kena Hari Lima tu tadi.

Dulu ari nya, Jaul begulai enggau Direktor UKPN, Datu Dr Chai Khin Chung Meresa Bot Laju ‘SC Todak’ Ba Pengkalan Opis Tasik Malaysia Sarawak.

Nya alai, ku Jaul, tanggung pengawa UKPN endang besai dikena nentuka pengelikun nengeri endang meruan baka ke diatu.

“Kitai meri terima kasih ngagai semua kita (UKPN) laban udah bebendar nyaga pengelikun ba nengeri tu, kitai ngarapka pengawa manah kita tu terus meruan,” ku iya. – Ukas