MIRI: Penyedar mensia mayuh bekaul pemeresi sungai endang pekara berat laban sungai entara keresa ke pemadu beguna ngagai semua orang.

Menteri Perengka Pengangkut Datuk Lee Kim Shin arapka semua komuniti besaup nyaga pemeresi sungai lalu anang sengapa muai uras ke dalam sungai.

“Pemeresi sungai endang tanggung pengawa semua. Ukai semina dilempai ngagai perintah.
“Enti semua kitai bekerejasama nyadi sungai kitai deka nyadi beresi.

Iya ke mega Adun Senadin madah munyi nya maya bejadika Program Penyedar Mensia Mayuh senentang pengelikun enggau pemeresi sungai Kampung Tudan Fasa 4 enggau 5, ditu diatur ba Dewan Serbaguna Tudan Fasa 5 ensana.

Kenu ku tanya Kim Shin, Nama kebuah sungai kitai kamah? Kebuah iya datai ari ulah kitai empu.
“Muai uras sengapa ngagai sungai. Semua utai kamah dibuai ke sungai. Sungai nyau nyadi tong uras,” ku iya.

Nya alai, Kim Shin ngarapka mensia mayuh sedarka pekara nya lalu badu agi muai uras sengapa dikena nentuka pemeresi kandang sungai lebih agi sida ke diau ba kandang mengeri.

Berebak enggau nya, Kim Shin madah pengawa ngatur program nya endang inisiatif perintah Sarawak dikena nyeridi mensia mayuh bekaul enggau pemesai guna pengelikun perengka pengangkut sungai sereta pengawa nyaga pemeresi sungai.-Ukas