SIMUNJAN: Perintah Sarawak udah nyiri Ketuai Raban Bansa Enggau Tuai Rumah (KMKK) dikena ngiring sesebengkah komuniti ba sesebengkah rumah panjai.

Kaban Kunsil Nengeri (Adun) Simunjan, Awla Dris madah, KMKK bejalaika tanggung pengawa nentuka pemansang enggau pengelantang ba genap genturung pendiau tauka rumah panjai.

“KMKK patut bejalaika tanggung pengawa nerangka polisi perintah ngagai rayat.

“Pia mega, aku meransang kita ngambika terus bekerejasama enggau pangan diri, anang pambar.
“Enti kitai pambar dia orang bukai tentu nyamai ngelabuh enti kitai nadai begempung tauka sepenemu,” ku iya.

Awla madah munyi nya ba Program Pemesai Begulai Enggau Rayat diatur ba Ruai Gempuru, Opis Pelilih Simunjan, kena Hari Lima minggu ke udah.

Berebak enggau nya ku Awla, KMKK patut nyaup pengari rayat ngelala bagi pekara ke beguna amat ngagai mensia mayuh awakka bantu ulih diberi.