KUCHING: Penero mural ‘The Last Ring Ladies’ Leonard Siew 34 taun madahka ati iya tebuka deka nero mural indu Bidayuh tu pengudah sida tuchum ngagai iya.

Iya madahka, lebuh ngelawa lima iku indu etnik Bi’embhan di Semban iya sigi enda nemu seleka jaku ti disebut sida ngagai iya.

“Taja aku enda nemu jaku sida tang sida tuchum ngagai aku baka ti deka nusi cherita.

“Meda gaya sida bejalai enggau pekayan ti dikena sida dia aku bulih runding deka nero mural ngambika ‘The Last Ring Ladies’ tu terus dikeingatka belama,” ku iya.

Leonard bejaku munyi nya lebuh dirandau pemberita lebuh ngulu Pengerami Ngintu Hari Kaunsil Kandang Menua Padawan (MPP) ke-24 enggau Ngelancharka Mural ‘The Last Ring Ladies’ ba Begunan Giant Lama di Batu 10 ditu, tadi.

Ku iya, taja napi mayuh pemar nero mural nya, iya berasa gaga sereta temegah laban mural indu Bidayuh tu mujur didero enggau manah dalam timpuh 13 minggu.

“Gaya hari siti ari pemar ti ditapi aku lebuh nero mural, enti mua hari udah chelum tauka aku nemu hari deka ujan aku ngetu dulu sebedau berengkah nero baru pengudah ujan badu.

“Kelimpah ari nya, aku mega bisi berasai takut nero ba dinding peninggi empat tingkat, tang udah kelama-lama asai takut aku nya lenyau kediri,” ku iya.

Leonard madahka, chat ti dikena iya nero nya bansa ‘waterbond’ iya nya chat ti dikena orang ngechat dinding begunan.

“Chat tu tan entara tujuh ngagai sepuluh taun,” ku iya.

Iya ngarapka mural ‘The Last Ring Ladies’ meruan dikeingat nyadi sebagai ari pesaka lama taja majak lus jeman diatu.

‘The Ring Ladies’ ngayanka pengaya adat asal bansa Bidayuh ari Ulu Bengoh ti dikumbai Bi’embhan di Kampung Semban, Ulu Bengoh.

Sida bepun dikela lebuh ngena ‘Ruyank’ng enggau ‘Rasunk’ng’ temaga ti dililit ba lengan enggau betis kenyau ari mit.

Ku cherita, indu Bidayuh ti ngena perengka tu ulih dikemegahka laban nya nyadi kelai indu nya bajik sereta datai ari ruang bilik ti menyana.

Leonard Siew