ASAJAYA: Palan bedaja baru di Kampung Tembirat ke beungkus RM7 juta deka mantu ngurangka penanggul jalai sekut di genturung nya.

Adun Asajaya Datuk Abdul Karim Rahman Hamzah madahka projek ngaga palan bedaja baru nya deka dipejalai enda lama agi dikena mantu raban orang bedaja ba tisi jalai alun di Kampung Tembirat diatu.

“Lebuh maya ujung minggu jalai alun di kampung tu sekut laban orang ari mengeri bisi kitu meli barang pemakai baka asil betanam betupi enggau asil pemakai tasik.

“Nya ngujungka penguna jalai alun bukai napi pemar deka bejalai nengah jalai tu,” ku iya.

Karim bejaku munyi nya lebuh ditanya pemberita pengudah Program Nasih Tanah Palan Bedaja Baru Kampung Tembirat ditu, kemari.

Ku iya, berindik ari nya langgur dua projek besai buka digaga ba Tembirat ungkup pemaik peranak ba genturung nya enggau orang bukai ti suah ngelawa Tembirat.

“Kelimpah palan bedaja baru, perintah mega ngaga dua projek bukai ditu iya nya Waterfront Tembirat enggau ngaga benteng tasik pemanjai 950 meter.

“Waterfront Tembirat deka bisi sebuah ‘astaka’ iya nya palan endur ngatur aktiviti lalu benteng tasik digaga awakka rumah di genturung nya enda runtuh ketegal ai pasang besai,” ku iya.

Tandu iya, ungkus ngaga palan bedaja baru penyampau RM7 juta, Waterfront Tembirat RM31 juta enggau benteng tasik penyampau RM35 juta tu udah diagihka perintah.

“Penyampau RM73 juta agih belanja dikena ngaga tiga buah projek di Kampung Tembirat tu ungkup mantu ngemanahka ekonomi enggau pengelantang rayat ditu.

“Palan nya ila ukai semina endur meli barang aja tang ulih nyadi palan endur makai, palan bejalai ngelantang ati enggau palan ngatur aktiviti bukai.

“Aku agi dalam perambu deka ngatur aktiviti ti beguna ungkup peranak menua awakka mayuh agi orang mengeri datai kitu,” ku iya.