KUCHING: Peranak Sarawak ti datai ari menua luar mesti dikuarantin 10 hari ba palan kuarantin.

Komiti Penyangga Penusah Ngenyit Negeri (JPBN) madahka peresa rT-PCR orang nya deka diambi ba hari kedua enggau kelapan.

Nyema peresa sida ba hari kelapan negatif, sida deka dikemendarka keluar ari palan kuarantin ba hari kesepuluh lalu nyambung laluh kuarantin empat hari di rumah.

Ku JPBN, taja pia gelang lengan deka dipasang ngagai orang nya lebuh iya nyambung kuarantin di rumah.

Ungkup peranak ukai asal ari Sarawak enggau ukai rayat Malaysia, sida deka dikuarantin 10 hari enggau ngambi peresa rT-PCR di pintu tama keterubah.

Nangkan nya, atur tama ke Sarawat ari Semenanjung, Sabah enggau Labuan netapka semua orang ti baru pulai ari palan nya mesti dikuarantin 10 hari ba palan kuarantin.

Peresa rT-PCR deka diambi ba hari kedua enggau kelapan lalu nyema pemutus negatif orang nya deka dikemandarka nyambung kuarantin ba rumah ba hari ke-10 ngagai ke-14.

Berebak enggau nya, JPBN madahka Opis Menteri Dagang Temuai, Seni enggau Main Asal Sarawak dalam perambu ngaluska atur Dagang Temuai Pengerai (Medical Tourism).

Sehari tu, JPBN madahka nadai kes positif baru Covid-19 dirikodka ba Sarawak ti ngujungka penyampau kes positif Covid-19 di menua tu mengkang 1,075 kes.

Pia mega, Kluster Greenhill ba Pelilih Menua Kuching, Miri enggau Bintulu ditukuka udah punas laban nadai ngerikodka kes baru dalam timpuh 28 hari.

Diatu semina tinggal Kluster Besi di Pelilih Menua Kuching agi ngerekai.

Bisi siti kes baru Covid-19 udah suman sereta dikemendarka pansut ari sepital ti ngujungka kes suman sereta dikemendarka pansut ari sepital nambah 1,045 kes.

Nya ngujungka semina 11 iku orang agi diperubatka ba sepital ke alai semilan iku di Sepital Besai Sarawak, siku di Sepital Miri enggau siku di Sepital Bintulu.