KUCHING: Tanggung pengawa nyadi pengari rayat maya musim Covid-19 bisi tejanggal laban pejalai disekat deka ngabas rayat, ku Lo Khere Chiang.

Kaban Kunsil Nengeri (Adun) Batu Kitang nya madah madah, taja pia iya enggau naka ulih deka ngabas semua rayat di sitak nya ngambika nadai dikelaung nitihka Atur Pengawa Standard (SOP) ke patut.

“Ungkup pengelantang semua kitai, semua SOP ti ditetapka perintah patut dititihka enggau manah.

“Baka nya mega lebuh kitai deka ngabang tauka ngusung bala kaban belayan enggau bala bakih ti ngintu Hari Krismas,” ku iya.

Khere Chiang bejaku munyi nya lebuh ngulu Pengerami Makai Lemai Mantar Krismas Begulai enggau Gerempung Veteran Soldadu Malaysia (PVTM) Sitak Landeh di Balai Mensia Mayuh Batu 10 ditu, ensana.

Ku iya, endang udah nyadi pekara ti suah digaga maya ngintu pengerami iya nya begusung rumah pangan diri.

“Aku ngelalau kitai ngambika nitih semua SOP ti dipadahka perintah maya ngusung rumah kaban belayan.

“Aku enda nagang kitai sama begusung bala kaban, tang anang enda nitihka atur ti patut ungkup pemaik semua kitai.

“Nyema kitai enda begusung rumah orang lebuh ngintu Hari Krismas taun tu pan enda ngawa laban ba taun-taun ke bukai kitai ulih ngusung sida maya Covid-19 udah punas,” ku iya.

Bejaku pasal soldadu veteran, Khere Chiang madahka perintah seruran ngenang jasa Soldadu Darat Malaysia (ATM) ti sanggup begadai nyawa ngetanka menua.

“Lebuh gawa kitai bisi ninggalka anak bini  laban ngembuan tanggungpengawa besai nyaga menua.

“Pia mega, bisi bala kita lesi bebadi lebuh gawa enggau nyadi tachat ketegal ngetanka menua.

“Aku empu ngaku enti nadai kita menua kitai enda ulih likun baka diatu,” ku iya.

Iya nandu, raban soldadu di menua tu endang patut diangkat nyadi bujang berani.

Ku iya, raban veteran soldadu di sitak Landeh diatu manggai 450 iku.

Iya ngarapka raban veteran soldadu tu terus begempung nyaga pengelikun komuniti sida ba sitak Landeh lalu ulih nyaga ruang bilik ti diau ba genturung nya.

Malam nya, PVTM mega bisi meri bantu belanja ngagai balu veteran soldadu enggau raban veteran soldadu ti nyadi orang nyelai pendiau (OKU).

Sama bisi datai Direktor PVTM Mejer Pahot Joll enggau bala bukai.