PADAWAN: Kepala Menteri Datuk Patinggi Abang Johari Tun Openg ngenukuka Pengawa Bepilih Nengeri Ke-12 (PRN-12) deka diatur taun baru.

Ku iya, nitihka perambu, pengawa bepilih deka diatur taun tu tang dilanjar ketegal pengerekai Covid-19.

“Kebendar, perambu kami deka ngatur PRN12 tumu agi tang perambu nya dilanjar ketegal Covid-19 laban ngenang rayat,” ku Abang Johari.

Abang Johari mansutka jaku nya lebuh dirandau ba Pengerami Makai Taun Ke-24 Kausil Mengeri Padawan (MPP) enggau bejadika mural ‘The Last Ring Ladies’ di Kota Padawan, ditu tadi.

Taja pia, Abang Johari ti mega Chairman Gempung Parti Sarawak (GPS) madahka diri enda nemu kemaya lebuh ditanya bulan berapa pengawa bepilih.

Pia mega, Abang Johari ngiarka penemu pasal PRN12 disadang deka diatur bulan March.

“Taun baru, tang aku enda nemu kemaya lalu diatu udah bulan Disember.

“Perintah GPS kasih ke rayat, nya kebuah kami ngelanjar pengawa bepilih taja penggal nyau deka abis laban kami ngemeratka pengerai rayat.