MUKAH: Sapit Kepala Menteri Datuk Amar Awang Tengah Ali Hasan ngasaika peranak pelilih Mukah enggau Dalat entara palan chunto pemadu madah ulah beserakup pupu bansa enggau pengarap di Sarawak.

Ku iya, nengah pejalai pengidup iya kala meri servis ba pelilih nya sebedau tu, iya meda rayat pupu bansa dia udah begulai kenyau kelia.

Tandu iya, taja bisi bida pengarap tauka bansa, rayat dia agi begulai sejalai sereta nadai penanggul.

“Aku ulih meda kelebih agi maya musim pengerami ke alai aku seruran dikangau ngerami Hari Raya enggau Krismas ngagai kampung nyentukka diatu.

“Gaya pengidup tu nyadi pekara ti digaga ninting maya ti ukai digaga sengapa sekeda komuniti,” ku iya bejaku ba pengerami Bejadika Taman Solidariti di Pekan Dalat ensana.

Iya madahka, gaya nya nandaka politik di Sarawak stabil lalu ulih mantu perintah ngemansangka negeri tu enggau manah.

Penyerakup nengah proses pemansang tu nandaka pemansang baka jalai alun di Dalat udah betambah maju enti dibanding kelia ti semina jalai mit enggau jalai sungai.

Diatu ku iya Perintah Sarawak deka terus komited ngemansangka menua pesisir nitih chuan kediri kelebih agi penyerakup ti udah lama dikemeran.

Bekaul peminta Datuk Seri Fatimah numbuhka Palan Penyangkai Entukar (OSCV) di Dalat iya madahka pekara nya deka dipasukka ba dalam Langgur Pemansang Malaysia Lumpar Ke-12 taun baru.

Kelimpah ari nya, iya ngarapka nengah pengawa raban Craun Research Sdn Bhd ungkup projek biogis asil rampang sagu di Mukah enggau Dalat deka digaga sebaka enggau pengawa ti digaga Kaunsil Pemansang Industri Apong Sarawak.

Sama bisi datai Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Fatimah Abdullah, tuai raban bansa enggau mensia mayuh ke diau besemak.