MIRI: Nengeri Sarawak nerima pemeranak puku pemadu mayuh dibanding nengeri bukai di Malaysia.

Kepala Menteri Datuk Patinggi Abang Johari Tun Openg madahka pekara tu bepelasarka Pansik Belanja Makit UOB entara bulan Januari ngagai September taun tu.

“Ba pansik nya, sida madahka negeri ti nerima pemeranak puku enggau ngerembaika ekonomi di Malaysia nya Sarawak.

“Penyampau puku diperanak tu manggai RM15.8 billion,” ku iya.

Abang Johari bejaku munyi nya lebuh bejadika Program Nasih Tanah Projek Palan Pemansang Main Asal Orang Ulu ditu tadi.

Ku iya, pekara nya nyadi ketegal Sarawak ngembuan ekonomi ti enda begilik, bebasaka bansa bukai sereta begempung.

“Politik kitai di Sarawak tu tegap lalu nengah pelasar ti inklusif tauka mungkur semua pekara.

“Kitai ditu nadai penanggul ti besai, tang sayau sida di Semenanjung enda nemu badu napi penanggul berebutka pangku pengawa nyadi Menteri Besai.

“Enti politik menua begilik, nadai orang deka beranakka puku ba menua kitai,” ku iya.