SARATOK: Ketuai ke siru ulih dipeda ari pengiruh iya gawa ngemansangka rayat.

Tuai Rumah Serudin Ason madahka penyiru enggau pengasih pengari rayat baka ditunjukka Kaban Parlimen Saratok, Ali Biju endang nyengala dipeda enggau diasaika sida serumah.

Ku iya, apin dipadu nyadi Sapit Menteri Pengeluar Kuasa enggau Pengeraja Asal suba pen Ali endang semampai siru enggau kasihka rayat ti udah andalka iya nyadi pengari sida enggau mai pemansang kia.

“Iya (Ali) mendingka sebana kami serumah ke merinsa nadai jalai penyambung ke meruan ngelawa rumah panjai.

“Nambahka nya, kami balat irauka pengelikun entukar ke ditinggalka ba tanah seberai din. Tambah agi enti maya hari ujan bangat malam hari.

“Ari nya tadi, iya enda betangguh lalu ngemendarka projek ngaga jematan semin beungkus RM200,000 ngambi entukar ulih sangkai ba kaki tangga rumah kami ditu,” ku iya.

Tuai Rumah Serudin mansutka jaku nya ba pengawa nyuaka chek Projek Mit Pemansang Menua Pesisir (MRP) ari Ali ti diarika pengajar Walter Changgai ba rumah panjai sida di Semambu Ulu, Kabo Krian ditu, apin lama ke udah.

Iya madahka langkar jematan ke digaga meraka Batang Kabo nya chukup penegap enggau teguh enda ngipakka ungkus munyi ke dipadah raban injinir ari Sri Aman ke meresa jematan nya.

“Reti iya, projek tu digaga enggau naka pemanah, bisi kualiti sereta nitihka standard pengelikun ti udah ditetap.

“Kami chukup benasip bulih pengari rayat ke seruran betatika penyuntuk enggau pemerinsa kami ke sebedau tu betengahka jematan gantung ngelayang ke seberai,” ku iya madah nyemetak.

Ke penerang, RM20,000 udah diberi ngagai Rumah Panjai Serudin Ason ke alai Komiti Pemansang enggau Pengelikun Genturung Pendiau (JKKK) nerima RM15,000 seraya RM5,000 ungkup Biro Indu.

Berita penuh Ruai 3 pagila.