KUCHING: Orang gawa perintah ba Sarawak patut nunda menua luar ti ngemansang dunya digitalisasyen ngambi sida muntang agi nelebaka diri napi pandemik Covid-19.

Kepala Menteri Datuk Patinggi Abang Johari Tun Openg madahka inisiatif belajar ari menua luar nya siti pengelebih.

“Ambika banding, Estonia udah nerima digitalisasyen enggau diaku nyadi komuniti digital pemadu maju ba dunya.

“Estonia udah nyapai mayuh pemujur ngujungka sida pintar lebuh ngena inisiatif dalam inovasyen,” ku iya.

Abang Johari mansutka jaku nya lebuh bejadika Anugerah Konvensyen Inovasyen Orang Gawa Perintah Sarawak ( SCISICA) di Palan Aum Borneo Kuching (BCCK), ditu tadi.

Ku Abang Johari, inisiatif dipejalai Estonia mungkur Digita ID lebuh nyendiaka akses servis perintah digital, ngundi nengah i-Voting, ngena blockchain ba mayuh pengawa merintah nyengkaum pengerai, bechara, undang-undang enggau pengelikun.