KUALA LUMPUR: Taun 2021 deka nyadi taun ke nguji semua kitai, ku Sapit Menteri Pengeluar Kuasa enggau Pengeraja Asal, Ali Biju.

Ku iya, sedarka penguji besai nganti kitai udah tu, dia perintah ngena enam chara dikumbai 6R napi semua pekara ke disadang nyadi.

“Chara 6R tu Resolve (Penetap Runding), Resilience (Pengeliat Ati), Restart (Ngepun Baru), Recovery (Strategi Nyuman), Revitalize (Ngering) enggau Reform (Ngelangkar Baru).

“Kitai udah chukup tuai runding meretika chara tu endang bekaul rat enggau pengerai ekonomi kitai jeman Covid-19 ke nuntung menua diatu,” ku iya lebuh dirandau Suara Sarawak.

Ali madah, ngena chara tu mega perintah andal sereta pechaya ulih ngintu pengelantang rayat enggau nyamin ekonomi mengkang ngerembai.

Nya alai ku iya, sukung tegut semua Kaban Parlimen ba pekara belanja rambau Aum Parlimen tu tadi beguna amat lalu mai reti ke besai ngagai menua lebih agi rayat.

“Pemereti ati enggau penuai runding rayat enggau bala tuai ke megai menua pemadu beguna diatu lebuh menua napi penguji ti nadai ulih ditinjau manang ngena batu ilau.

“Tegika jari kita, beri mih sukung ngagai pengawa tauka penemu ti mai pemaik enggau penguntung ngagai menua enggau rayat.

“Anang kitai kelalu nekul runding diri ngena pemabu penemu bepolitik tang perundingka nasip rayat ke merinsa, ti begunaka bantu,” lalau Ali.

Berita penuh Ruai 2 pagila