KENA 17 Disember tu tadi, sebengkah adat dikumbai Babukung tauka Adat Nopeng udah diatur ba Desa Sukamandang, Kecamatan Seruyan Tengah, Kabupaten Seruyan, Provinsi Kalimantan Tengah din.

Nitihka penerang ari siku tuai adat di menua nya, Pak Abet Nego, adat tu suah diatur maya bisi ngatur pengerami melah pinang enggau betutus.

“Jaku Nopeng tu mai reti ngerasukka gari ke digaga ari macham utai ke nunda gamal jelu di darat enggau dalam ai.

“Enti sema bisi ruang bilik nya udah bisi belanja endur nirika pengerami melah pinang tauka nganjung anak sida betutus tang bisi sekeda kaban belayan tauka bala bakih ke nadai diambi ngabang.

“Ari nya tadi, sida ke datai tu deka nangkupka karung mua enggau ngerasukka gari nunda gamal jelu ti dibap ngena akar, randau enggau daun kayu kampung,” ku Pak Abet lebuh dirandau Suara Sarawak.

KENA NGAJAR… Adat Nopeng tu sengaja nyeriri ulah orang ke bepilih bulu lebuh ngambi pengabang ngulu pengerami diatur sida.

Iya madah, sida nya endang sengaja ngelalaika mua diri empu lalu ngeluluka diri baka ‘jelu’ ke datai ngachau enggau nyerungkai dapur minta makai.

Pengawa sida tu enda nyalah bala jelu jangkit ke datai ngerusak utai tanam ba kebun enggau umai nyentuk utai dalam langkau abis diserungkai sida.

Ulah ke ngasuh kitai geli ati ku Pak Abet, lebuh meda gamal enggau chara sida tu ngelangkung diri bejalai tauka meragau nunda pendiau jelu ke dikeluluka sida.

Ku iya, bisi sekeda sida nya tadi chukup landik bekelulu lalu ngasuh pengerami richah, mensia mayuh chapuh ketawa ngerangkai ngeli meda ulah, pemanchal enggau penatau sida nya.

“Enti sida tu enda diberi makai enggau jampat, dia bala ‘jelu’ tu deka ngachau enggau nundi mudi orang mayuh ke benung berami dia, ngambi sama enda terenah.

LANDIK BEKELULU… Sida ke datai sengaja ngelalaika mua diri empu, ngerasukka topeng mua nunda gamal jelu.

“Reti adat tauka kelulu sida tu ngingatka kitai ngambi semampai ngenang kaban belayan baik jauh tauka semak sereta bala bakih ke kala enggau kitai begulai.

“Lalau ulih ditibak kitai ari kelulu sida tu, anang enda ingatka kaban belayan enda ngira maya kitai tusah tauka senang.

“Baka kitai ke begawai, kitai enda tau bepilih bulu lebuh bekangauka bala kaban belayan enggau bakih datai ngabang enggau ngulu pengerami nya.

“Anang kitai semina ngangau (ngambi) pengabang ari orang ke senang tauka pemisi aja laban ngandalka diri dibalas tang ngelaungka kaban belayan enggau bakih ke mensena.

“Ari nya, jaga manah mih kaul begulai enggau pangan diri. Munyi ku jaku sempama, bisi niki pinang, bisi niki nibong.

“Jaku sempama tu ukai semina diguna lebuh kitai ngatur adat tauka pechara aja, tang reti iya mungkur pekara besai ke agi ari nya laban pengidup kitai endang bepelasarka adat.

“Jaku tuai nyebut, bejalai betungkatka Adat, tinduk bepanggalka pengingat. Tu ajar ke semampai disebut ngagai anak telesak diri.

“Baka tu mih pengingat ke ditusi sida ke tuai ngagai aku,” ku Pak Abet nyimpul kenang diri.

TATAU… Bemacham gaya tauka ulah kena nyeriri ulah mensia ke enda keruan.

 

TUAI ADAT… Pak Abet Nego