SIBU: Siku lelaki peranak Indonesia ke gawa nyadi welder ditemu parai lebuh benung gawa.

Penusah nya nyadi ba sebuah duk kapal di Sungai Bidut ditu, lemai kemari.

Ketuai Polis Pelilih Sibu ACP Stanley Jonathan Ringgit lebuh ngenukuka penusah nya madah, niang beumur 45 taun benama Marlan Rusdi ari Bentunai di Singkawang.

“Niang dipelaba parai ketegal tangkap karan lebuh benung miki sebuah kapal ba duk nya.

“Bakih niang tetemuka iya enda ngeleda di baruh kapal ke benung dibiki nya urung pukul 4.30 lemai.

“Meda tudah enda nemu orang, bakih iya berumban minta sah pengaji sida ke udah nya ngangauka ambulan enggau ngaga ripot polis,” terang iya.

Stanley madah, bala derisa ari Sepital Sibu ke ngesah kia bisi meda dua bekau betu ba dada muakka kiba niang.

Nya alai niang dipelaba kena tangkap karan lebuh ke gawa, ku iya nandu.

Ku Stanley, pansik tumu madahka niang nurun gawa urung pukul 7.30 pagi baka selama.

“Polis nadai tetemuka sebarang bekau pengawa salah ba endur penusah nyadi lebuh bejalaika pansik dia.

“Niang mega begari manah ngena gari kereja enggau sarung jari.

“Buntas pansik deka dipejalai ngambi nemu pun pemarai niang,” ku iya lalu madahka kes nya dikumbai parai mejal (SDR) seraya nganti pemutus buntas pansik.