SARATOK: RM20,000 udah diagihka pemansang Komiti Pemansang enggau Pengelikun Genturung Pendiau (JKKK) Rumah Blayong, Sungai Empait, Ulu Roban ditu.

Sapit Menteri Pengeluar Kuasa enggau Pengeraja Asal, Ali Biju ngarapka mayuh agi aktiviti ngaul pemansang ekonomi rama enggau pelajar ulih dipejalai.

Ku iya, raban JKKK nyengkaum Biro Indu udah dilempaika tanggung pengawa ngaduka pemansang di rumah panjai ti pulaika pemaik sida serumah.

“Aku andal amat kita ke udah dipadu ngaduka pengawa betuaika Tuai Rumah Blayong empu deka ngesan pangku pengawa enggau ati ke lurus.

“Ambika chunto, kita tau ngatur pengawa beripai nyendiaka diri ngintu Hari Krismas enggau Taun Baru 2021 tu nengah mayuh macham program baka ngupas kandang ngelingi rumah.

“Enti kandang rumah kita beresi, ukai semina manah dipeda tang mega ungkup nyaga pengerai enggau pengelikun kita serumah,” ku iya ngelalau.

Jaku lalau Ali nya dikenataika pengari iya, John Angga lebuh nyuaka chek Projek Mit Pemansang Menua Pesisir (MRP) ngagai Tuai Rumah Blayong ba pengawa diatur di rumah panjai sida, apin lama ke udah.

Raban ari Palan Servis Komuniti Sitak Parlimen Saratok sehari nya mega udah niki ngagai Rumah Andrew Dana Sungai Isu, Maras, Krian laban nyuaka PA System berega RM3,070 ungkup JKKK sida.

Berita penuh ba Ruai 3 pagila.