KUCHING: Gerempung Ketuai Raban Bansa Enggau Tuai Rumah Bansa Iban Bagi Menua Kuching (Pemaik) nerima agih belanja RM10,000 ari Sapit Kepala Menteri Datuk Amar Douglas Uggah Embas.

Chairman Pemaik Tr Dennis Sungkok madahka agih belanja tu diberi ungkup sida ngatur Kus Nyadi Tuai Komiti Pengelikun Enggau Pemansang Genturung Pendiau (JKKK).

“Kami deka ngatur kus tu ngagai raban chairman, sekretari enggau tukang wang tiap JKKK ba baruh pegai kami.

“Aku ngarapka pejalai program tu bejalai manah sereta ngarapka semua raban JKKK meri kerejasama ngagai Pemaik,” ku iya.

Dennis bejaku munyi nya pengudah Aum Besai Kelima Pemaik ba sebuah restoran ditu, kemari.

Tandu iya, Pemaik mega bisi nerima RM10,000 agih bantu ari Menijar Besai Tay Motor Sdn Bhd, Aaron Tay dikena sida ngatur aktiviti.

Sama bisi datai Sekretari Politik Kepala Menteri Petrus Igat Mathias enggau bala bukai.

Ba aum nya mega, Petrus bisi nyuaka setipikit nyirika Tuai Rumah baru Kampung Tabuan Jaya Tengah sereta nyuaka setipikit nyambung pangku pengawa lima iku tuai rumah ke bukai.