SIBU: Presiden Parti Progresif Demokratik (PDP) Dato Sri Tiong King Sing udah ngabas sepuluh buah rumah panjai ba sitak Dun Dudong berengkah pukul 4.30 pagi Hari Minggu tu tadi.

Batang tuju pejalai tu laban deka nerang pasal isu ke nyadi sereta ngerapit kaul enggau peranak dia.

Sepanjai pejalai ngabas nya, iya madahka tebal agi rumah panjai agi bisi apin diseleti lalu bisi sekeda rumah panjai enda likun laban mayuh utai rusak dalam rumah nyengkaum perengkaguna pemun baka bekal ai beresi enggau kuasa karan apin disikap penuh.

Pia mega ku iya, bisi sekeda rumah panjai begunaka jalai alun ti meruan agi ngambi ngemuntangka peranak dia mindah ke bukai.

Tiong ti mega Kaban Parlimen Bintulu meri jamin deka mantaika penanggul nya ngagai Perintah Sarawak kelimpah naka ulih ngulihka belanja ungkup rumah panjai ba sitak Dun Dudong.

Nambahka nya, iya deka mantaika peminta peranak tu ngagai raban bekaul.

Berebak enggau nya, Tiong ti mega Duta Khas Menteri Besai ke Republik Rakyat China ngarapka parti komponen GPS bekenanas gawaka rayat ke alai ketuai mesti panjai runding enggau nyadi chunto ngagai kaban parti

“Anang salah guna kuasa kita mejal kaban parti renggat baru enggau ngachau penyerakup dalam GPS.

“Lebuh nemuai ke rumah panjai, baru aku nemu sekeda ketuai komuniti ba wilayah tengah diemba laban sida nyukung parti komponen GPS ke bukai.

“Sida mega ngena kuasa enggau penuduk diri nagang semua pengawa lalu pekara tu enda patut nyadi,” terang iya.