KUCHING: Sacofa Sdn Bhd (Safoca) naka ulih ngemanahka servis arus penyambung ba Sarawak kelebih agi ba menua ulu, ku Direktor iya, Zaid Zaini.

Ku iya, naka tu sida benung chakah ngemanahka servis arus penyambung ba Kapit enggau Mulu ti deka meri pemaik besai kelimpah ngenyemakka komuniti menua pesisir ngagai ekonomi digital.

“Kami deka nambahka peneras arus penyambung ditu abis nadai 100 megabit per sikin kelebih agi Mulu ti nyadi palan pematak temuai.
“Mulu tu bisi pengulih lebuh temuai datai, sida begunaka arus penyambung ti deras ngambi ulih bekunsika peneleba nemuai ke Sarawak.

“Pekara tu mega ulih mantu nyungkak sektor dagang temuai enggau sektor bukai ba menua tu,” terang Zaid.
Zaid mansutka jaku nya ngagai pemberita pengudah Pengerami Makai Lemai Begulai Enggau Pemberita 2020 di Palan Aum Borneo Kuching (BCCK).

Ngelansa silik, Sacofa seruran nyukung sereta bekerejasama enggau Perintah Besai enggau Perintah Sarawak nentuka arus penyambung majak dikerembai enggau ngerapit takah digital.

“Kami diatu fokus ngagai menua pesisir lalu kami mega ngaul kerejasama enggau Kaunsil Multimedia Sarawak (SMA) sereta Komiti Komunikasyen enggau Multimedia Malaysia nentuka perambu enggau projek pemansang arus penyambung lanchar dipejalai,” ku Zain nerang silik.

Nitihka ripot dalam taun 2017, Sacofa merambu nirika 5,000 tiang pemanchar ba Sarawak ba timpuh lima taun nyentuk 2022 ngambi nyapai juluk digitalisasyen Sarawak sereta nyapai 95 peratus arus penyambung ba selampur menua.