SARATOK: Pengerami Hari Krismas taun tu diintu jauh bebida bepelasarka Atur Standard Pengawa (SOP) ke udah ditetapka Komiti Penyangga Penusah Nengeri (JPBN) Sarawak.

Sapit Menteri Pengeluar Kuasa enggau Pengeraja Asal, Ali Biju madahka atur nya enda nanggul rayat ngintu pengerami nya enggau pengelantang.

Ku iya, rayat disiplin agi lebuh ngasika SOP dikena nyaga pengerai enggau pengelikun diri empu enggau orang bukai serayaka berami begulai enggau pangan diri.

“Taja kitai ngintu pengerami belalauka atur udah ditetapka raban bekaul, tang kitai ngerami hari besai kudus tu kelai terima kasih ke berekat ba pengidup.

“Ari nya aku meransang semua kitai ngena awak tu ngatur pengawa ke ulih ngerapitka kaul begulai tang tetap nyaga takah enggau pemeresi diri empu,” ku iya.

ARI KAMI… Ali nerima tepa ari Tuai Rumah Sati ti ngarika Gerempung Indu.

Ali ke mega Kaban Parlimen Saratok mansutka jaku nya lebuh nerima kangau ngabang Hari Krismas ngagai Rumah Sati Bukol, Sungai Pitoh, Kop Ibus ditu, tengahari kemari.

Iya ngarapka Hari Krismas ti kudus tu deka ngerapitka tanggam kaul begulai lebih agi orang dikesayau kitai.

“Selamat Hari Krismas enggau Selamat Taun Baru 2021 ngagai semua, bulih berekat enggau pengelantang lebih ari taun ke udah,” ku sampi iya.

Beserimbai enggau nya, iya udah nyuaka chek Projek Mit Pemansang Menua Pesisir (MRP) RM15,000 ngagai Komiti Pemansang enggau Pengelikun Genturung Pendiau (JKKK) Rumah Sati Bukol.

Nambahka nya, Gerempung Indu sida mega nerima RM7,000 dikena ngatur pengawa pemansang rama enggau ekonomi orang indu dia.

Berita penuh Ruai 3 pagila

KENANG NGABANG KRISMAS… Ali begambar enggau kaban Gerempung Indu Rumah Sati