SARATOK: Berekat ari pengeransing ngereja pengawa di tanah, Mark Chendang Anak Chebun, 49 taun, diatu nyadi siku pekebun enggau pedagang nanas ke mujur.

Peranak asal Sungai Panggau, Kabo ke siru agi dikangau Mark madahka diri nadai napi sebarang penanggul sekumbang Atur Mindah Betagang (PKP) diteritka dalam tengan bulan March taun tu tadi.

“Sekumbang PKP tu, aku kira ke nadai penanggul laban sekeda ari nanas dijual ba mua ladang ditu empu.

“Semina lebuh terubah PKP suba bisi penanggul mimit laban enda dikemendar bejual, tambah mega nadai orang datai meli.

“Nasip endar lebuh nya YB Ali Biju bisi meli buah nanas ari aku, diberi iya ngagai sida ba kebajikan (Opis Pengintu Pengelantang Pendiau),” ku iya lebuh ngepunka randau enggau Suara Sarawak.

JAUH PERENING… Mark temegah ati meda asil kebun nanas iya empu.

LANDIK BEDAGANG

Ku Mark, bisi dua chara dikena iya ngelakuka dagang buah nanas ngambi ulih mansutka asil ti maksimun.

Kesatu ku iya, ngena servis orang tengah lalu kedua, bejual kediri empu ngambi bungkur makit besai agi.

“Orang tengah ke meli buah nanas datai ari sida di Betong, Saratok enggau Miri.

“Sebedau pandemik Covid-19 ngerekai suba, sida ari menua Brunei Darussalam mega bisi datai meli enggau ngambi bekal buah nanas kitu.

“Tang ketegal atur nagang pengerekai Covid-19 ngujungka kitai nyau nadai ulih bejual baka selama.

“Taja pia, asil ari pengawa bejual kediri mujur mansi dagang nanas ke lenyau nya,” ku Mark seraya tuchum.

Iya madah, asil bekebun enda kurang ari RM5,000 ngagai RM6,000 sebulan jam ke diatu.

Sida ti meli nanas deka datai ngelawa kebun kia, dijual ba mua penatai, bisi didirika bansal endur bejual.

Rega sigi buah Nanas Moris nitihka gred seraya MD2 deka ditimbang kilo, RM5 sekilo.

BANSA NANAS PELAI… Nanas MD2 nerima mayuh peminta ketegal pemanis enggau pelai.

PELUANG KEREJA

Mark mega madah, dalam taun 2019 iya semina disaup dua iku pengereja aja tang diatu pengawa majak nambah laban kebun nyau manggai 20 ikar pemesai.

Ari nya iya diatu ngaji enam iku pengereja ngambi bisi besaup ngereja lalu pengawa deka lempung agi dikereja sereta ulih dirumban lebuh agi musin ngetau.

“Sida enam tu mih ke nyaup aku ngintu pengawa di kebun laban temu enda alah siku ngereja.

“Pengawa mega chukup mayuh, ari nebas, ngupas, mantun, ngesum, ngetau, berangkutka buah nyentuk ke bejual.

“Enti nadai sida tu, ka pepedis asai gawa nengali, asil mega enda tentu mayuh baka ke diatu pelaba aku.

“Mesa ga enti tubuh siku aja ke ngereja, enda pia ku nuan,” ku Mark ngenang pengawa di kebun.

Nambahka nya ku Mark, iya mega berasai lantang ati ulih nyendia pengawa puang ngagai sida, nyaup nyungkak ekonomi.

“Ari sida bekuli ke mengeri, manah agi sida ngidupka diri di menua ditu, rumah enda ibuh nyuwa, api ai bisi mega ba mengeri.

“Chukup penyamai diau enggau gawa di menua diri empu, semak apai indai, lepa pengawa ulih limpang berikan tauka ngiga daun babas ke lauk.

“Seada-ada pemakai, ukai baka di mengeri, semua ulih nimbak ngena pala agong, munyi ku orang,” ku Mark ngenang penyauh bida idup di mengeri.

BEJUAL KEDIRI EMPU… Buah nanas ke udah diketau deka dijual ba bansal didiri ba mua kebun.

SISTEM REHAT

Diatu bisi urung 144,000 pun nanas ke ditanam Mark ba kebun pemesai 20 ikar nya.

Terubah nanam nanas dalam ujung taun 2015 suba ari ansak apai iya empu, Tuai Rumah Chebun ti sayauka tanah sida di Wong Besi rega ngapa nadai mansutka sebarang asil.

“Nanas terubah ditanam mansutka asil dalam bulan Oktober 2016, kurang ari setaun, engka ketegal tanah agi ami enggau chukup intu sereta jaga.

“Suba endang nadai teulihka runding ngereja pengawa bekebun tau mansutka asil ngemayuh tu. Gawa di Singapore pan enda mih bulih nyampau tu.

“Enti orang nusi, engka aku enda pechaya, tang udah diri empu kala bulih RM17,000 sebulan.

“Chukup pengaga dalam ati din, baka tu kini asai kena tikit munyi ku orang,” ku Mark mantaika pengaga diri lebuh ngenang asil diulih diri empu.

Iya madahka diri ngena sistem rehat ngambi buah chukup tuai lebuh sekali ngarang.

Nanas tu ulih dikarang lebuh umur manggai 13 ngagai 18 bulan sereta bepanggai ba bansa nanas mega.

Enti chukup intu, jaga enggau sum, nanas deka tumbuh galak sereta mansutka mayuh asil.

Sekali ngarang buah dalam 1000 ngagai 2000 igi seminggu diatu enti dibanding setaun ke udah semina 800 igi sekali ngetau, dua minggu sekali.

Pemayuh buah diketau mega ditatak nitihka gaya peminta makit tauka penyampau udar orang tengah.

“Enti maya hari besai baka Taun Baru China, Gawai Dayak, Hari Raya enggau Hari Krismas, penyampau buah ke diketau deka nambah nitihka peminta.

“Taja kitai pedis deka naga berapa penyampau ke ulih dijual, tang ngelama tu endang enda kurang ari 2,000 igi sekali nyual.

“Reti iya, asil bejual dalam sebulan nya sigi ditagit aku dalam 10,000 igi tauka lebih agi.

“Ari nya, kitai beratika asil diulih dalam sebulan endang enda tetap tang pemandai enggau pemintar kitai ngatur kebun enggau dagang ngambi enda rugi.

“Nya alai aku ngiga chara ngemayuhka pemansut asil, enda semina bepanggai ba dagang buah aja, tang paung iya mega ulih dijual,” ku iya ngelalau.

TANAH AMI… Tanah sida Mark di Wong Besi mujur dikemansang nyadi kebun nanas.

PAUNG BEREGA

Kelimpah ari nyual buah nanas, Mark mega bisi nyual paung nanas kelebih agi paung MD2 ke nerima peminta tinggi.

Iya madahka diri bisi nerima bantu ari Kaunsil Industri Nanas Malaysia (LPNM) enggau Sitak Pemansang Betanam Betupi Begempuru (IADA) Kalaka Saribas Betong.

“Nitihka dipadah raban ari LPNM, aku dipilih sida nyadi siku ari pemekal paung nanas ngagai kaunsil nya.

“Entara paung nanas ke bisi dijual nya baka MD2, Moris, N36, Nanas Sawit tauka Nanas Pada sereta Nanas Paun mimit,” terang iya.

Ngenang pasal rega paung nanas, Mark madahka semua nya bepanggai ba bansa nanas enggau pemanah paung ke dijual.

Ku iya, nitih gaya udar sida, enti MD2 siti paung nya RM2.50 seraya Moris murah agi, 30 sen siti paung.

“Ambika chunto, enti Moris dijual aku bisi 15,000 iti paung, tentu rega mega bisi RM4,500.

“Tang pemayuh paung ke dijual ninting enda sebaka belama laban bepanggai ba penyampau udar orang.

“Baka dalam bulan November tu tadi, aku bisi udar paung nanas Moris 15,000 iti enggau MD2 nya bisi 500 iti.

“Lalu dalam pun bulan Desember aku baru tejualka 3,000 iti paung nanas Moris,” terang Mark seraya nambah, paung nya diambi sida ke meli di kebun empu.

PERANSANG DIRI

Taja kala bulih RM17,000 sebulan, tang Mark enda bebelika keresa enggau pengeraja baka orang bukai.

“Aku tu endang nyelai ari orang bukai, enda gila enggau orang bebelika kerita besai enggau pengeraja bukai.

“Aku sigi asal orang merinsa, nya kebuah aku berunding panjai sebedau ngereja pengawa.

“Agi tubah perambu ungkup pengidup jemah ila, ngemansangka kebun enggau ruang bilik diri empu ngambi enda ngining pengidup orang bukai.

“Taja enda kereja perintah enggau bepangkat besai, tang aku ngasaika diri mujur agi gawa bekebun ari makai gaji bulan,” ku Mark nyimpul kenang diri.