SARIKEI: Opis Bomba enggau Penyah Penusah Sarikei chakah ngiri penemu ngagai peranak rumah panjai bekaul chara nyeliahka penusah angus.

Program nya terus dipejalai nyadi sebagi ari chara dikena ngiri penemu ngagai peranak rumah panjai bekaul enggau pekara pengelikun.

Ketuai Balai Bomba enggau Penyah Penusah Sarikei, Mahmudin Narudin madah, program ke pemadu baru, sida bisi ngatur program ba Rumah Nyuka Ulu Sarikei, Rumah Lat Bayong, Rumah Tayang enggau Rumah Anthony.

Ku iya, program nya sebagi chara dikena ngedut kaul raban Bomba enggau mensia mayuh kelimpah meri tangkan awakka seruran ngemeratka pengelikun rumah panjai ari penusah angus.

“Penusah angus rumah panjai ukai semina ulih ngujungka penusah bebadi nyawa tang mega mai pengerugi lenyau reta tengkira.

“Nya alai, program penyedar ke baka tu endang chukup manah diatur.

“Kelimpah meri servis ngagai mensia mayuh, kami mega ngiri penemu ngagai mensia mayuh sentang pemesai guna kerejasama enggau raban bomba,” ku iya madah ngagai Suara Sarawak, ensana.

Berebak enggau nya, Mahmudin madah raban Bomba enda ulih ngereja pengawa kediri enti nadai sukung ari semua orang.

Kenu ku iya, penyedar mensia mayuh ba sukut pengelikun ulih nyeliahka penusah enda disadang di rumah panjai lebih agi baka penusah angus.

“Kelimpah licha ba rumah panjai, kami mega bisi meri penerang bekaul enggau tanggung pengawa raban bomba lebih ngagai bala nembiak tadika nyentuk ngagai nembiak sekula sekondari,” ku iya.