Agi kelia munya urung lebih 300 taun udah lalu, Kampung Lubuk Punggor dikelala sebuah palan menua pesisir ke jauh udu ari mengeri.

Nyema deka nemuai ngagai Kampung Lubuk Punggor maya nya ukai pekara ti muntang. Temuai mesti dulu nepan perau baikka ari Muara Tuang, Samarahan, ari Kuching tauka ari Pasar Simunjan.

Tang, tebal agi bala temuai enti deka nemuai ngagai Kampung Lubuk Punggor sida nengah pasar Simunjan tauka Gedong.

Kebuah pia, penyauh Pasar Simunjan tauka Gedong dampih agi enti dibanding enggau palan bukai laban maya nya kampung tu bedau bisi jalai alun.

Tama ngagai Lubuk Punggor peranak kampung mesti pandai milih awak ti engkeman nengah Sungai Batang Sadong.

Rampa Menua Kampung Lubuk Punggor

Nyema awak ti dipilih salah dia temuai deka napi pangka bena lebuh dalam perau.

Pangka bena siti penyadi gelumbang besai lebuh ai pasang bepun.

Gelumbang bena ulih nyapai tikas tiga meter lalu tau ngasuh karam enti lebuh ngena perau mit.

Kelimpah ari nya, temuai mega ulih dikeruga jagu ti suah mansutka diri maya pangka bena tauka lebuh ai surut.

Jagu ukai semina suah ditemu nyemerai ba sungai, tang mega suah dipeda ngeradai ba tebing sungai ke luchak.

Nya ngasuh ati peranak Kampung Lubuk Punggor irau laban sida suah nengah sungai nya ari kampung ke Simunjan tauka Gedong.

DIATU UDAH DATAI JALAI

Bisi umai paya ke besai.

Tang, diatu pengirau ati sida udah apus lebuh Kampung Lubuk Punggor disediaka perengkaguna pemun jalai alun ari Kota Samarahan enggau Simunjan.

Peranak Kampung Lubuk Punggor enda agi numpang perau laban udah ulih mai kerita, van enggau motosikal.

Nyema sida seka niki perau pan semina ungkup nangkap ikan enggau undang di sungai tauka nuju kebun ba seberai sungai.

Ketuai PBB Zon Pangkor ti mega Kaban Kaunsil Pelilih Menua Simunjan, Mohd Izzuddin Abdullah madahka peranak Kampung Lubuk Punggor diatu berasai temegah laban kampung sida udah muntang dilawa ari jalai darat.

Ku iya, nengah jalai alun ti meruan, peranak kampung ulih keluar nemuai ngagai palan besemak baka Simunjan, Gedong, Serian, Kota Samarahan, Sadong Jaya, Asajaya nyengkaum mengeri Kuching.

Mohd Izzuddin Abdullah

Iya madahka, tegal sistem jalai alun ti manah, pekara nya udah ngemuntangka peranak kampung ti gawa pulai hari ari Kota Samarahan enggau Kuching.

“Pengawa betanam betupi lebih regas lebuh peranak kampung ulih ngangkut asil tanam baka sawit ke kilang besemak ngena lori.

“Tu asil pengawa Perintah Gempung Parti Sarawak kelebih agi Adun Gedong Datuk Mohd Naroden Majais enggau sekeda Kaban Parlimen Batang Sadong di pelilih tu nyengkaum Datuk Seri Nancy Shukri.

“Pia mega, enggau jalai alun tu Datuk Naroden sereta bala nembiak udah bekayuh basikal ari Gedong ngagai Kampung Lubuk Punggor,” ku iya.

Seroji Hazmi

NANAM SAWIT ENGGAU BUMAI

Diatu pengawa besai dikereja peranak Kampung Lubuk Punggor iya nya betanam betupi baka nanam sawit enggau bumai.

Kelimpah ari nya, sida mega bisi ti bekereja ba dandang sawit, gawa enggau ejensi perintah sereta peribit.

Peranak Kampung Lubuk Punggor mega chakah bedagang lebuh nyereta Gerempung Kerejasama Kampung Lubuk Punggor Simunjan Berhad.

Gerempung Kerejasama tu ditukuka Komiti Gerempung Kerejasama Malaysia (SKM) nyadi entara gerempung kerejasama pemadu nyulut ba Sarawak.

Siku peranak kampung, Seroji Hazmi, 74 taun madahka kampung sida udah bisi kenyau 300 taun udah lalu.

Edi Ameng

Ku iya, lebuh iya agi biak Kampung Lubuk Punggor agi mayuh pengurang sereta mar dilawa.

“Diatu mayuh udah berubah, aku enda kala bemimpi sebedau tu lebuh mayuh amai pemansang nyadi ngagai kampung kami baka jalai alun enggau pemansang betanam betupi,” ku iya.

Sebaka enggau kampung bukai di pesisir, Kampung Lubuk Punggor diatu mega bisi perengkaguna pemun baka bekal kuasa karan 24 jam, masegit baru, rumah belelak, librari enggau sekula primari.

Peranak kampung mega deka teulihka bekal ai beresi enda lama agi lebuh kereja ngaga tangki ai di genturung kampung tembu.

Nitihka sejarah orang tuai kelia, nama Kampung Lubuk Punggor datai ari tiga bengkah cherita lebuh orang kampung tetemuka sepun kayu mati enda memukai temu ayan ba tengah sungai.

Kenu ku sida, pun kayu mati disebut punggor, laban semina bisi batang lalu daun kayu udah layu lalu mati.

ASAL NAMA PUNGGOR

Nyerita pasal sejarah tu, siku peranak kampung Edi Ameng madahka, lebuh pun kayu ti ditemu mati nya ayan peranak kampung serentak nyebut jaku ‘punggor’ laban sida tekenyit meda pekara nya.

Ku iya, udah nya peranak kampung nyebut jaku ‘punggor’ lalu pun kayu mati ti ayan nya tadi terus tenggelam.

“Peranak kampung becherita pasal kisah nya ngagai orang bukai lalu nama punggor nya mengkang disebut datai kediatu ti ngujungka nama Kampung Lubuk Punggor,” ku iya.

Nitihka sejarah bukai kampung tu dipelaba udah ayan kira-kira 300 taun udah lalu, tang semina ditemu peranak kampung ti muka tanah ungkup aktiviti betanam betupi baka bumai ba pun taun 1930-an.

Sebedau nama Lubuk Punggor ayan, kampung nya semina dikelala nyadi pelilih ti belubuk enggau sungai.

Ku Edi ti kala gawa nyadi Sekretari JKK Kampung Lubok Punggor urung taun 1990-an, Kampung Lubuk Punggor udah beberapa kali dipilih nyadi champion Pekit Kampung Pemadu Nyulut Pelilih Menua Simunjan ba taun 1988.

“Maya nya kami andalka ketuai kampung di Kampung Lubuk Punggor ulih mulaika penyulut tu laban mayuh perengkaguna udah disediaka.

“Pia mega, sekeda pekara mayuh nyadi ditu baka pangka bena enggau dandang padi ti ulih dikemansang nyadi produk dagang temuai ke Kampung Lubuk Punggor,”