KUCHING: Penegap politik entara pekara pemadu beguna ba Malaysia manggai taun 2021 ila, ku Datuk Seri Wan Junaidi Tuanku Jaafar.

Menteri Pemansang Dagang enggau Gerempung Kerejasama (Medac) nya madah, tu mega entara pekara ti deka ngujungka penegap enggau pengerembai ekonomi menua tu.

“Penegap politik tu mega deka ngujungka pengereja pengawa perintah ulih ngemujurka pengawa ke udah dikemendar ba Parlimen bepelasarka Bajet 2021,” ku iya.

Junaidi ke mega Kaban Parlimen Santubong madah munyi nya ngagai raban pemberita pengudah Ngabas Palan Gerempung Kerejasama Nasional Malaysia Berhad (Angkasa) Sarawak ditu, kemari.

Ku iya, enti politik nadai tegap nya deka meri pangka ngagai penegap ekonomi menua.

“Pekara tu deka ngujungka pemeranak puku ari luar tusah deka beranakka puku ba menua kitai, enti bisi pan sida deka lebih bejimat,” ku iya.

Ngelansa pekara bekaul, iya ngelalau bala orang politik ba menua tu  enda ibuh bemain isu politik ti nguntungka diri enggau ngetanka pangkat diri.

“tuju politik endang dikena ngulihka kuasa lalu kuasa mega dikena ngatur menua sereta merin pemaik nyengkaum ngintu pengelantang rayat.

“Nya alai, nyema orang politik enda mujur bejalaika pengawa nya sida bedau tau nyadi orang politik, “ku iya.