KUCHING: Selampur nengeri Sarawak patut disikap enggau servis arus internet ke menyana dikena ngemansangka rayat nuju ekonomi digital, ku Datuk Dr Abdul Rahman Junaidi.

Menteri Muda Pekara Islam enggau Dewan Bandaraya Kuching Utara (DBKU) nya madah, nengah pemisi arus internet ke manah nya deka ngemujurka sukut pemansang ekonomi digital awakka Sarawak setanding enggau nengeri maju bukai ba Malaysia.

“Kenyau tiga taun ke udah, Kepala Menteri Datuk Patinggi Abang Johari Tun Openg udah bejalaika mayuh inisiatif ungkup pemansang nengeri tu.

“Beratika nengeri tu ngembuan tanah ke besai nyadi Abang Johari udah mungkal inisiatif ekonomi digital kenyau 2017 dikena ngerumban pemansang ba Sarawak dalam semua sukut,” ku iya maya Pengerami Bejadika Unifi ba Tebing Sungai Boyan, Gersik enggau Sourabaya Ulu (BGS), kemari.

Nya alai, ku Abdul Rahman nengah inisiatif Telekom Malaysia (TM), Komiti Komunikasyen enggau Multimedia Malaysia (SKMM) sereta ejensi bukai, nyadi bungkur arus internet ba mengeri enggau menua pesisir deka ulih diadu menyana.

“Nadai pulaika penanggul, udah tu kitai bejalaika pengawa ke baka tu ba menua pesisir.

“Nya alai, terima kasih ngagai raban TM laban udah nyendiaka servis Unifi ba mayuh bengkah endur laban kitai nemu Sarawak sebuah nengeri ke chukup besai lalu servis TM tu endang beguna amat,” ku iya.

Beduduk ari nya, iya mega nyukung langgur penemu Abang Johari ti deka Sarawak nunda pemujur menua Estonia nyadi menua maju bepelasarka ekonomi digital.